The Mill Resorts a regla disputa cu gobierno pafo di Corte

ORANJESTAD – E compania cu ta opera e hotel The Mill Resorts, a yega na un acuerdo pafo di corte cu gobierno riba e caso di wetland cu tabata den disputa. Minister encarga cu infrastructura Otmar Oduber a confirma esaki na NoticiaCla. Ta trata di un tereno cu e compania tabatin pa por a haci expansion, pero cu a bira un disputa debi na e Ruimtelijke Ontwikkelings Plan (ROP) cu ta determina cu parti di e tereno aki ta tereno ‘berde’. Siman pasa, gobierno, Aruba Birdlife Conservation y The Mill a yega na un acuerdo. Pa un periodo temporal cu cu februari 2019, e compania por haci uso di cierto parti di e tereno halando e bareranan un poco mas patras, pa proteccion di e wetlands, e trafico di pahra y permiti riba e tereno asigna pa pone nan container y ekiponan. Despues di e periodo, The Mill lo atende e asunto bek den bodem procedura.