Hendrik Tevreden: Ultimatum di diaranson merdia pa gobierno vigente ainda

ORANJESTAD – E ultimatum poni pa Comision Accion Nacional pa diaranson merdia 12’or pa gobierno contesta riba aumento di tarifa di coriente ta keda vigente. “Nos falta mas contesta pa haya” Hendrik Tevreden, actuando como lider di e grupo aki, a bisa NoticiaCla.com diamars anochi laat. Ora cu a puntre si esei kier men cu e ultimatum ta vigente, su contesta tabata “Si. Keto Bai”. Segun Tevreden, e la haya informacion di gobierno diamars mainta berdad, pero no tur. “Nos a ricibi contesta parcialmente, pesey” Tevreden a sigui bisa.

E hecho cu minister Otmar Oduber diamars mainta a bisa cu ta duna contesta sea diaranson of mas tarda diabierna, Tevreden no ta na altura di dje. “Sr Minister no a splica mi nada di esey personal. Mi a mira awor aki na tv. Kisas mayan e lo cumunica esey?” Tevreden a sigui bisa. Na final di cuenta segun Tevreden, pueblo merece contesta. “Pueblo a cuminsa wordo cobra caba contra nan deseo. Esey ta hopi serio” Tevreden a bisa, refiriendo na e aumento di tarifa di coriente, cu a cuminsa dia 1 di october ultimo. Mes momento segun Tevreden, gobierno a haya suficiente tempo pa contesta.

“Si bo mira bon, ta di dia 19 ainda no por contesta. Kier men, of an no kier contesta, of nan no ta tuma e asunto aki como algo serio” Tevreden a sigui bisa NoticiaCla.com. Pues pa diaranson merdia 12’or tin un deadline cu ta vence, y cu gobierno tin cu cumpli cune.

Loke ta remarcable, ta e falta di comunicacion cu tin entre e dos partidonan aki. Minister Oduber a bisa NoticiaCla.com cu e no sa di ningun ultimatum. Di parti di Tevreden, e no ta na altura cu a pidi pa pospone e ultimatum. Un problema di comunicacion, cu por crea mas problema cu solucion, manera cu NoticiaCla.com por a compronde. E foto di NoticiaCla.com ta di archivo di un siman pasa durante e manifestacion di e grupo CAN.