Aki 6 luna mester tin acuerdo entre Aruba y Corsou pa Fast Ferry

ORANJESTAD – E intencion di gobierno di Aruba ta pa dentro di 6 luna tin un acuerdo entre Aruba y Corsou y un operador conoci cu por opera e proyecto di Fast Ferry, y ta planea pa aki dos aña (fin di 2019) e proyecto por wak luz di dia. . Asina minister di Transporte Chris Romero a bisa den un conferencia di prensa dialuna. Ademas na NoticiaCla e mandatario a sigura cu ora cu e operacion cuminsa, ta ranca sali mesora cu transporte di tanto pasahero como auto entre e dos islanan, pa un tarifa hopi barata.

DETAYES

E mandatario a mustra cu e intencion ta pa e operacion aki genera trabou directo pa por lo menos 120 hende, y indirectamente 600. E prijs pa persona, aunke no ta confirma segun e mandatario, por bin ta 100 florin of mas barata pa persona. No a haci mencion si si esaki ta encera auto tambe, pasobra esey tin cu wordo determina despues. Tambe ta papia di 800 pasahero cu e ferry por transporta y 300 vehiculo.

STAVAZA

Manera cu cos ta mustra aworaki, e mandatario a reuni cu tur stakeholder y tur ta mustra di ta interesa y positivo segun e mandatario. Parlamento tambe a haya presentacion y tur tambe tabata piositivo. Entre un pa dos luna e a mandatario lo kier yega na un acuerdo entre Aruba y Corsou aunke no a specifica ki tipo di acuerdo esaki ta. Por pensa riba entre otro e asunto di douane y imigracion, y e publieke randvoorwaarden. Y aki 6 luna kier tin un acuerdo cu tanto e compania operador y tin tur cos regla entre Aruba y Corsou. Aworaki tin dos pa tres operador interesa y tin mas den ‘tapara’.