Awe NoticiaCla.com ta cumpli 4 aña di existencia !

ORANJESTAD – NoticiaCla.com ta cumpli 4 aña di existencia awe. Tabata riba un fecha manera awe, 2 di juli pero na 2014, cu e portal a keda lansa oficialmente ora cu e minister di telecomunicacion di e tempo ey Mike de Meza a primi e boton pa manda e portal online, y mesora e portal a haya su lugar den tanto den comunidad local como internacional. E la sa di distingui su mes for di tur otro, pa varios motibo. E tipo di noticianan cu e ta presenta, e cantidad y tambe e seriedad cu cual esaki ta keda presenta. Nos kier a gradici e lector primordialmente pa su atencion, gradici e comerciantenan cu a y ta sigui deposita nan confianza incondicional den e portal aki. Entre nan, Garage Cordia cu a yuda cu e unidad mobil di NoticiaCla, Setar NV cu ta encarga cu e parti tecnico pa asina e señal di tanto e website como programa riba facebook por pasa sin ningun problema. Y esey sin lubida otro patrocinadornan cu a cuminsa cu e portal aki y esunnan cu a uni na caminda. Despues di 4 aña, por bisa cu e portal a conoce hopi cambio importante, y cu por bisa cu tur trankilidad cu awe e ta figura entre e grandinan, pa tur motibo necesario. Su veracidad, su lihereza den trece noticia, e plataformanan cu e ta ofrece, e facilidad cu e ta duna su lectornan pa siguie pa medio di su app (introduci aña pasa y inaugura pa S.E. Gobernador Boekhoudt), y asina por sigui. Tin mas plan cu lo keda revela dentro di poco. Di curason, NoticiaCla ta gradici tur hende cu a sostene for di comienso, y ta sigura cu e intencion ta pa sigui brinda e mesun calidad di noticia pa hopi aña nos dilanti. Danki, danki y danki.