Wever: A cancela biahe pa Corsou, pa atende situacion na Aruba

ORANJESTAD – Prome minister di Aruba Evelyn Wever a opta pa cancela su bishita pa Corsou awe, pa e atende cu e situacion actual politico na Aruba mes. Asina e mandatario a confirma pa NoticiaCla awe mainta. “Mi presencia ta rekeri na Aruba mey mey di e desaroyonan aki” Wever a cuminsa na bisa. Cu e situacion, e kier men e desaroyo cu a surgi despues cu minister Otmar Oduber a anuncia e cobransa di Serlimar pa pikimentodi sushi na cas, y e efectonan di e introduccion di e crisisheffing diadomingo ultimo. “Ademas tin dos minister na Corsou pa representa Aruba, Glenbert Croes y Xiomara Ruiz-Maduro”. Como tal e prome mandatario a opta pa cancela su biahe di awe mainta pa e isla bisiña. E propio fraccion di Wever, no ta contento cu e minister Oduber y a informe di esaki den un carta diabierna, cu Oduber mientrastanto a contesta diasabra caba. Y mientras cu e asunto di Serlimar mester beneficia un grupo di persona na Aruba, (pensionadonan y esnan di menos recurso), tin basta disgusto den comunidad pa cu e situacion cu a surgi. 

BISHITA CORSOU

Manera cu NoticiaCla a raporta ayera tardi, e intencion tabata pa Wever biaha pa Corsou awe mainta tempran y topa e pareha Real, Rey Willem Alexander y Reina Maxima na Corsou. E pareha Real a yega Corsou diadomingo atardi relaciona cu e Dia Di Bandera di Corsou di awe. Esaki tambe tabata e meta di bishita di Wever. " Mi ta bai pa celebracion di Dia Di Bandera pa mustra e lasonan di hermandad entre e islanan. Mas y mas nos kier logra cu hunto cu Curacao nos enfrenta e retonan nos dilanti, cu ta hopi similar" e mandatario a bisa e portal aki ayera tardi ainda. Wever a topa e Rey dos luna pasa na Hulanda caba.