Augustus ta deadline pa Hard Rock hotel

ORANJESTAD – Si pa augustus awor e grupo Southwest no keda cla cu financiamento pa desaroya e ruina di Bushiri Hotel den un Hard Rock Hotel, gobierno lo tuma e tereno aki bek. Cu esaki gobierno ta confirma cu e grupo no ta haya mas tempo pa regla nan financiamento. Pues, minister ta confirma cu luna di augustus ta D-month pa e grupo. Mes momento sinembargo, Oduber diaranson a presenta un carta di garantia di e banco AIB (Aruba Investment Bank)como prueba cu e proceso di bidding a bay corecto, y cu no a actua illegal manera su contrincantenan kier pretende. Cu contrincante, Oduber ta referi primordialmente na conocido ex hotelero Jan de Ruijter y partido MEP, cu ken segun Oduber, de Ruijter lo ta hopi serca liga.

Segun Oduber, de Ruijter ta haciendo intentonan grandi pa desacredita su persona, pa motibo cu de Ruijter no a haya trabou serca e mandatario. Recientemente de Ruijter a indica cu e destaho pa e proyecto tabata illegal, debi cu na momento di e destaho, no tabatin un garantia di e grupo pa cual e grupo no tabatin derecho pa sali como ganador. Tin di haber cu e fecha riba cual e destaho a tuma lugar y cu segun de Ruijter pa e fecha ey e grupo Southwest no tabatin un carta den su poder. Como tal e comision cu a evalua y otorga e grupo menciona e proyecto, lo a actua contra ley pa cual lo a entrega keho contra nan. Sinembargo a resulta cu e grupo tabatin un carta den su poder, cu de Ruijter no tabatin conocemento di dje. Riba e carta aki ta stipula e garantia di 2 miyon cu segun Oduber nunca antes a sosode.

Pa loke ta e situacion di e grupo, Oduber a mustra cu a duna nan 20 dia (comienso di juni a splica esaki caba) pa nan keda cla pa despues den 2 luna regla cu e accionistanan keda cla cu e partinan financiero completo. Unabes cu esey ta cla, e ora por bay notario pa traspasa e tereno. Ta trata di performance bonds di 8 miyon florin cu mester deposita. E 2 lunanan ta vence na augustus cu ta pone cu pa e tempo ey, minister Oduber a confirma na NoticiaCla, e garantia ta vence y lo mester entrega esaki na gobierno. Tin pues chens 50-50 chens segun Oduber cu esaki por bay bon.

Loke hopi kier wak ta actividad riba e tereno mes, y esey mester –segun Oduber- tuma lugar un luna despues cu e traspaso tuma lugar. Lo mester e ora basha e edificio abou , pa cual nan tin 3 luna di tempo pa cumpli cune. E mandatario a sigura NoticiaCla tambe cu e hecho cu tin un Hard Rock Hotel den pipeline pa Corsou tambe, no tin ningun efecto riba e operacion di e Hard Rock na Aruba. A uza otro hotelnan di renombre cu tin riba ambos isla, sin cu un ta stroba otro.