Oduber ta tira problema di ‘conmocion’ bek den scochi di MEP

ORANJESTAD – Falta di conocemento di e programa di gobernacion door di fraccion di MEP por ta e problema cu nan no ta na altura di e asunto di cobranza di serlimar pa recoge sushi. Por lo menos asina e carta di minister di medio ambiente Otmar ODuber ta sugeri den e carta di contesta (riba pregunta riba cobranza di sushi door di Serlimar) na presidente di Parlamento Ady Thijsen, pa fraccion di MEP diadomingo anochi. Den e lista di 11 pregunta, fraccion di e partido heel ta puntra entre otro na e mandatario si e ta di acuerdo cu e decision cu el a tuma (di e cobranza menciona), a causa conmocion den comunidad. Oduber den su contesta, ta considera e pregunta ey no solamente ‘sugestivo sino tambe ta insinua cu e fraccion no conoce e programa di gobernacion y cu door di no comunica su contenido, cu esey ta pone cu por tin conmocion den comunidad. No e hecho cu ta cobra awor pa recoge sushi. Pues e ta tira e bala bek den scochi di e fraccion.

NO TIN CULPA

Oduber ta mustra e fraccion pues cu no ta e la actua robez y cu no ta su decision a causa conmocion, pero ta e propio falta di conocemento di e punto aki, ta e problema. Ademas, Oduber ta mustra cu den e programa di gobernacion, ta bon delinea kico tur lo sosode riba e tereno aki. Y den e programa, debidamente ta haci mencion cu lo tin cobranza na e comunidad. Algo cu, segun Oduber, fraccion lo mester tabata na altura di dje. Contrario na e fraccion, e mandatario ta sigura cu e si a bay afo y comunica debidamente kico tur lo mester bin.

CONTRA LEY

Tambe e mandatario ta mustra e fraccion ariba, cu el a actua conforme ley, y cu esey ta nifica cu e loke a keda anuncia, ta simplemente sigura cu ta cumpliendo cu e leynan ya vigente. Pasobra di otro forma e mandatario lo ta violando esaki y pa cual e por wordo poni personalmente responsabel.

CONMOCION

Finalmente, e mandatario ta mustra e fraccion cu e conmocion no mester ta riba e tarifa cu ta cobra, sino riba e forma con den pasado, gobiernonan no tabata cumpli cu e ley, cu a pone cu awe nos tin problema serio di medio ambiente y e dump cu tin un sero di 20 meter halto. “Y parti di e solucion pa sanea e situacion, ta e cobranza menciona. Algo cu ta conforme e deseonan di e gobierno actual” Oduber ta sigui bisa. Pues segun e mandatario, e la actua corecto y cu e fraccion mester tabata na altura di tur esaki. Por lesa e contesta di e carta di Oduber AKI.