Oduber: Sindicatonan mes a aproba formula pa cobranza di sushi

ORANJESTAD – (Algun) sindicatonan cu antes tabata contra cobranza di un solo tarifa pa recohe sushi, a bay di acuerdo cu e metodo presenta dia 29 di juni ultimo. Asina minister di medio ambiente Otmar Oduber a contesta fraccion di MEP diadomingo. A pone algun, pasobra NoticiaCla a tende di por lo menos 2 sindicato cu nan no tabata envolvi y no ta sostene e loke a keda palabra. E forma aki como un di e 11 preguntanan haci diabierna riba e anuncio di cobranza pa recohe sushi. Mas interesante ta e motibo di e preguntanan manda: Fraccion di MEP a wordo gara fuera di base cu e presentacion di cobranza di Serlimar.

PREGUNTA

Tabata diabierna merdia fraccion di MEP a manda un lista di 11 pregunta na e minister, cuestionando e anuncio di e mandatario mainta cu Serlimar ta bay cuminsa cobra pa recoge sushi. E motibo ta cu e anuncio lo a coi e fraccion ‘fuera di base’ y no tabata na altura di e asunto y lo no tabata ningun tiki contento. Y cu e preguntanan, e fraccion a spera di haya contesta riba e preguntanan cu nan tabatin.

CONTESTANAN

Fuera di e formula usa pa cobra (esta di bracket unda cu ta cobra a base di salario di e persona), a puntra riba e maneho completo. Aki e mandatario a mustra cu no ta un maneho nobo sino mas bien cu ta cumpliendo cu un ley y regla existente caba. Pues nada nobo. E mandatario a manda tambe tur e documentacion cu ta substancia su decision. Tambe fraccion a puntra pakico ta cobra comunidad, siendo cu tin fondo aloca den e presupuesto netamente pa esey. Oduber a mustra cu berdad tin placa, pero cu e no ta suficiente y cu e intencion mester ta cu e compania mes mester bay genera su entrada independientemente.