Restonan di tortuga protegi descubri ariba rif

SAN NICOLAS - Awe pa mas o menos 10:30 mainta personal di Polis Maritimo a bin topa cu personal di Directie Natuur en Milieu na altura di e pier di Rodgers Beach cu cual conhuntamente un investigacion mester a wordo hasi. Cu e boto di Polis maritimo BP-2 e personal a bay pa midi na diferente luga e stroom di lama y e cantidad di oxígeno bou awa. Mas o menos 12:30 e personal a bay na altura di Reef Bird na unda e melding a drenta cu tawatin diferente casca di tortuga. Ora a yega ariba e rif enberdad a bin encontra 4 casca di tortuga y tambe cabesnan di tortuga. E tortuganan aki ta protegi y lastimamente ta bin encontra e restonan aki. E restonan di tortuga a wordo tuma den beslag door di personal Directie Natuur en Milieu. E tortuga aki ta un especie cu ta protegi pa e tratado internacional di CITES y alaves pa articulo 6 inciso 1 Natuur beschermingverordening Aruba. Mester recorda cu ta castigabel pa ley pa mata e especie protegi aki y cu tin multanan pisa pa cu esaki.