Serlimar ta cuminsa cobra pa recoge sushi na tur cas

ORANJESTAD – Entrante 1 di july awor, Serlimar ta cuminsa cobra pa recohe sushi na tur cas, incluyendo esnan cu ta usando otro compania. E tarifa cu tin cu paga, ta depende di e tipo di cliente. Segun minister encarga cu medio ambiente Otmar Oduber, e tarifa lo wordo cobra a travez di cobranza di impuesto, ‘di acuerdo cu e capacidad financiero di cada persona/cas’. Esnan cu tin un otro compania cu ta recohe nan sushi (p.e. EcoTech) , tambe lo tin cu paga, segun Oduber, pasobra e ley actual (cu no a cambia) ta bisa cu ‘e cobranza ta bay pa tur ‘ophaalpunt’ na Aruba. Esaki ta nifica tur cas (excluyendo e parti di comerciante), tin e obligacion di paga. Asina e mandatario a pone riba su facebook page pa clarificacion.

MAS CU RECOHE SUSHI

A splica ademas, cu ora cu ta haci pago, no ta solamente pa recohe sushi (cu ta e parti mas facil), sino pa e maneho di esaki tambe, pues locual cu ta pasa cu e desperdicio despues cu recohe esaki for di cada cas. A mustra cu Serlimar ta e unico compania encarga cune.

REDUCI ACTIVIDAD

E mandatario a sigui bisa cu gobierno ta ‘den e proceso pa introduci un miho forma pa maneha desperdicio y cu pronto lo reduci actividadnan cu ta tuma lugar riba Parkietenbos cu 90%. Por wak e tabel di cobransa segun tipo di cliente AKI.