Ruiz: A exonera banconan di cierto cobranza di impuesto

ORANJESTAD – Gobierno a yega na un acuerdo cu banconan, pa loke ta cierto entrada cu lo haya exoneracion di e cobranza di BAZV y BAVP. A bin cu un decreto ministerial, cu ta stipula kico ta wordo exonera. Banconan a haya esaki caba presenta y den curso di dia awe algun a presente na comunidad kico exactamente nan lo wordo exonera di dje y kico nan lo cobra e clientela. Den e caso aki, minister di finanza Xiomara Ruiz a dicidi cu pa transaccionnan bancario online y di credit card, banconan ta haya e exoneracion. Esaki pa no stroba e mercado y hacie mas caro pa e cliente, y pa no stroba e intencion pa yega na un asina yama ‘cashless economy’, esta un economia unda cu no tin placa efectivo. Pa loke ta e companianan di seguro aki tambe a splica cu a un solo caminda ta cobra y ta duna exoneracion riba pago di seguro WA.