Oduber: A keda proba cu Williams no tabatin prueba di corupcion

ORANJESTAD – Ciudadano Michael Williams no por a prueba den corte di e acusacionnan di e.o. corupcion, y esey pa gobierno tabata importante. Asina minister Otmar Oduber (cu ta esun cu a entama e caso contra Williams) a bisa NoticiaCla den su prome reaccion riba e caso. Oduber, no obstante cu huez no a concedi Oduber loke el a pidi contra ciudadano Michael Williams, ta hopi satisfecho cu e sentencia awe mainta. E mandatario ta interpreta e sentencia den forma cu e no a perde e caso, pasobra a bin claridad riba kico Williams tabatin of den e caso aki, ‘no tabatin’, esta prueba di corupcion. E mandatario a yama esaki te hasta un 'tremendo veredicto' y cu no tin necesidad pa apela. 

HUEZ

“Huez a papia hopi cla den su veredicto” Oduber a sigui bisa. E hecho cu huez no a duna Oduber e loke el a pidi, esta spreekverbod y rectificacion pa Williams, segun Oduber ta pasobra Williams no a presenta prueba di e acusacionnan, pues no por duna un prohibicion of rectificacion pa algo cu no tin. Segun Oduber, Williams a bisa algo pafo diferente cu el a declara den corte. Y como tal huez a huzge pa esey. “E postura (di Williams) a cambia completamente” Oduber a sigui bisa.

PROCESO

E hecho cu den corte Williams no a presenta prueba di cosnan cu a bay malo y di corupcion cu e destaho publico pa e asunto di Dump, ta importante pa e proceso cu ta andando cu awor gobierno por mustra e veredicto tambe na tur partido envolvi.