Gobierno a perde caso contra ciudadano Michael Williams

ORANJESTAD – Gobierno di Aruba a perde su caso cu el a entama contra ciudadano Michael Williams. Gobierno (lesa: minister Otmar Oduber) a demanda Williams pa expresionnan haci riba e.o. un destaho publico pa e asunto di Dump y a exigi un rectificacion y un orden pa ‘keda keto’ esta un ‘spreekverbod’. Williams a bringa e demanda aki. Corte awe mainta a dicta na fabor di Williams, argumentando cu no a proba suficientemente cu e declaracionnan di Williams por perhudica e proceso di e destaho publico.

E CASO

Gobierno (lesa: minister) a basa su mes riba un entrevista haci pa Williams den cual e ta haci declaracionnan cu por stroba e proceso di e deshaho. A cita varios parti di e entrevista, y a splica cu debi na e declaracionnan di Williams, ta pone e destaho den un luz negativo. Sinembargo corte ta mustra cu e hecho cu declaracion di Williams ta pone e destaho publico den un luz negativo, no ta motibo pa limita su derecho di libertad di expresion. Ademas segun corte, Williams no ta presenta prueba sino ta simplemente su opinion. E hecho cu Williams ta culpa gobierno di corupcion, no ta presenta como algo obhetivo. Ademas, segun corte, e palabra corupcion ta wordo asina hopi usa, tambe door di politico, cu e por wordo interpreta di varios forma. Finalmente, corte ta opina cu gobierno no a defende e argumento suficiente cu e declaracion di Williams por stroba e proceso di un deshaho publico corecto. Y ademas esnan cu tin duda den e proceso, facilmente por wordo informa cu dicho destaho lo cana segun regla y orden. E declaracionnan di Williams no ta stroba minister Oduber di actua y of stroba su trabou como minister, di tal forma cu gobierno por sali perhudica.