Clientenan di Banco di Caribe awor por haci pago online na DIMP

ORANJESTAD – Clientenan di Banco di Caribe awor tambe por paga nan asuntonan financiero online na oficina di impuesto esta DIMP. Diahuebs DIMP su director Luenne Pieters durante un conferencia di prensa a bisa cu asina nan ta celebra otro meta logra di DIMP cu otro partner financiero. E biaha aki ta Banco di Caribe pa loke ta e uni cu e servicio di online banking. Segun Pieters, partidonan a traha varios luna riba e proyecto y a test e sistema di SAP di DIMP y esun di Banco di Caribe. Tecniconan ta contento cu e resultado, y ta spera cu e clientenan tambe ta contento cu e servicio.

NECESIDAD

Pieters ta mustra cu e ta un caminda cu a encamina pa facilita servicio di impuesto. E servicio aki ta un necesidad awendia, unda clientenan a informa cu nan no mester bin e oficina pa haci pago sino mester por hacie esaki via e servicio online. Servicionan pa cual por haci e online banking ta e.o. loonbelasting, BBO y Dividend belasting. Tambe a mustra cu por reconcilia manera cu e pago drenta den un forma mas lihe. Lo raporta na e cliente ora cu e pago keda procesa. Tambe esaki ta e forma con lo raporta pa entre otro Banco Central y CAFT.

OTRO BANCONAN

Otro banconan na Aruba cu ainda no ta ofrece e servicio manera CMB, RBC y CIBC First Caribbean International Bank dentro di poco tambe lo uni riba e plataforma online. Interesante mencion di Pieters tabata cu poco poco lo bay elimina pago cu placa cash. E ta keda un forma legal di pago segun Pieters, pero tin hopi risico ora cu haci e pagonan aki den belasting, manera otro paisnan a demostra. E ta un trayectoria cu DIMP tambe ta trahando ariba.