Wever: Parlamento lo mester por haci cambio na protocol entre Hulanda y Aruba

ORANJESTAD – Intencion ta pa unabez cu tin un palabracion entre gobiernonan di Aruba y Hulanda riba e supervision financiero ‘nobo’, pa establece esaki den un protocol. E pregunta ta, si unabez cu e protocol bay Parlamento pa convirtie den un cambuio di e ley actual di CAft, esta LAft, si Parlamento tin espacio pa haci cambio di e contenido si nan no ta di acuerdo cune. Prome minister di Aruba Evelyn Wever Croes a confirma pa NoticiaCla cu Parlamento enberdad lo haya e espacio pa haci cambionan si nan no ta di acuerdo.

SPLICA PARLAMENTO

Ora cu e protocol ta cla entre Hulanda y Aruba, Wever ta bay Parlamento cune. “Na e momento ey mi por sinti cu Parlamento ta bay mee of no ta bay mee” Wever a bisa. E no ta papia di cu ta bay den un debate, sino cu e ta bay busca e sentimento di Parlamento. “Si mi sinti cu Parlamento por sostene (e protocol) den liñanan grandi, mi sa cu mi por continua. Si mi sinti cu Parlamento tin problema cu cierto puntonan, naturalmente no tin sentido pa bo manda un ley cu bo sa cu no ta wordo aproba” Wever a sigui bisa NoticiaCla. Raiz di e pregunta ta e resistencia di cierto parlamentarionan cu tin problema cu cierto aspecto di e ley actual cu ta duna CAft autoridad. Nan kier haci cierto cambionan dependiendo di e contenido, y sigur pa loke ta e ‘autoridad’ di e colegio di supervision financiero. “Na caminda lo bay tin espacio pa deliberacion cu parlamento ‘riba e ley’” Wever a sigura.

PUNTONAN PEGA

E prome mandatario a bisa tambe cu si tin puntonan cu Parlamento no ta di acuerdo cune, e peticion di Wever ta pa si tin cualkier cambio, pa bin cu un compensacion na e otro banda. “Con cu bay bin, ta importante si pa nos yega na un situacion di finanzas balansa” Wever a bisa. El a sigura e portal aki cu no ta haciendo tur e ehercicionan pa complace Hulanda, sino e ta e unico manera pa Aruba bay dilanti. Entre e posibilidadnan cu Wever ta mustra cu Parlamento lo por y kier cambia ta e porcentahe cu mester yega di e deficit, pero unda cu mester tin bon entendimento y cu un compensacion.

NON NEGOTIABLE

E mandatario (riba pregunta di NoticiaCla) a mustra si cu ainda no a yega na e punto te pa papia di cierto puntonan cu lo ‘no ta negoshable’, esta cu no por mishi cune. No tin ningun draft protocol riba mesa ainda, pero tin algun punto di salida si cu Aruba y Hulanda a yega na dje, manera cu otro aña e deficit mester bira 0.5% y e aña siguiente mester tin un surplus di 0.5% y e siguiente aña un surplus di 1%. Otro punto ta cu debe di Aruba mester baha na 2027 na 70% y pa 2039, na 50%. Segun estudionan haci, esaki ta alcansabel. E otro palabracion ta cu e supervision ta keda 3 aña (CAft) y mientrastanto ta cuminsa cu e begrotingskamer. Y finalmente e di 4 palabracion cu tin cu keda cla ainda ta e gastonan di personal. E ora por papia di protocol y si berdad por bisa cu lo por tin puntonan cu ta ‘no negoshable’.