Introducion di reforma di impuesto na januari 2019

ORANJESTAD – Intencion di gobierno ta pa introduci e reforma fiscal asina aña bolter na 2019. Asina prome minister Evelyn Wever a bisa NoticiaCla diahuebs mainta durante un conferencia di prensa. Mientras cu no ta conoci ainda ki tipo di reforma e lo bira, e lo tin un bista pa October kico e cambio ta, y si ta logra ainda. Un di e posibilidadnan cu ta ABB (Algemeen Bestedings Belasting), no ta mustra mucho mas factible debi cu gremionan comercial no ta mucho positivo riba esaki.

FECHA

Wever a admiti cu na inicio di e anuncio pa un reforma fiscal, a anuncia caba cu e intencion tabata pa introduci e reforma na 2019, pero na caminda a ripara cu mester tabata mas conservativo, mirando e trabounan rond di dje. Esey a pone cu a bisa e ora cu ta mas probable pa introduci e cambio den dos aña. Y e colegio di supervision financiero tambe a hiba esaki den nan analisis, indicando cu e crisisheffing lo por dura te cu 2 aña, prome cu por introduci e reforma. Pero e mandatario den e ultimo 6 simanan a bin keda cla cu informacion cu e ta mas convenci cu e cambio di reforma fiscal por keda cla prome cu fin di aña y cu por introduci’e na cambio di aña. “Pero tur esaki ta deseonan. Nos no ta 100% sigur ainda”.