Inspeccion di Salud na Corsou pro legalizacion cannabis medicinal

WILLEMSTAD – Centenar di pashent na Kòrsou ta uza zeta CBD, un extracto legal di cannabis. Por haña e cannabidiol aki via botica. Experto di cannabis, Jeany Jansen ta boga pa legalizacion di cannabis puro, pasobra esaki lo ta mas efectivo cerca enfermedad cronico. Inspeccion di Salubridad Publico ta pro legalizacion.

Segun inspector Jan Huurman mester legaliza cannabis na e mes manera cu esaki a sosode na Hulanda kaba. “Esey ke men: bou di condicionnan estricto”, Huurman ta bisa. “Na Hulanda cannabis a keda cay bou di lei di opio, i esaki lo mester conta pa Corsou tambe.” ‘E lo mester ta obtenibel solamente cu recèpt’- Inspektor Huurman

INSPECTOR DI SALUBRIDAD PUBLICO JAN HUURMAN

Na Hulanda un boticario a haña permit di prepara zeta cu THC (Tetrahydrocannabinol, e substancia cu pone bo bay halto. “Ta fásil pa traha regla pa esaki, e ora ei e ta sali riba e lista di remedi reconoce i bou di condicionnan estricto un medico por reset’é, e inspector-general ta bisa. “Ke men hacie obtenibel solamente cu resèpt.” Jeany Jansen tin cancer i e ta bisa cu for di dia cu e ta uza cannabis e tumor den su pechu a bira mas chikí. “E ta stabil tres aña caba.”

CANNABIDIOL DI SPAÑA

Su conocemento di cannabis e ta comparti cu cuater shen y pico pashent na Corsou cu ta bin cumpra e zeta cu 5 porciento cannabidiol (CBD) cerca dje. Mi ta importa e zeta aki for di Spaña. Ei nan ta tèst e den laboratorio. Asina mi sa sigur ku no tin nada otro agregá na dje.” Bo no por bai halto di zeta di CBD. “Pero bo mester sa si con frecuente i cuanto bo ta us’é”, Jansen ta bisa. Mi ta adverti mi clientenan cu nan no mester us’é den combinacion cu terapia di chemo.”

Ret Karibense