Oduber: JetBlue ta añadi dos buelo for di Boston pa Aruba

BOSTON - Despues di trabou duro den ekipo, JetBlue a un biaha mas anuncia cu lo sigui expande y lo añadi servicio adicional for di Boston. E aerolinea lo añadi 2 frecuencia mas for di Boston entrante ultimo cuartal di 2018, cu continuacion den 2019. Jetblue a expresa di ta sigui di ta hopi contento y satisfecho cu desaroyo di Aruba y e buelonan. Refleho di nan expansion continuo ta resultado di e demanda fuerte pa Aruba y di exito di expansion y introduccion di servicio nobo. Di Boston pa Aruba ta nan destino mas fuerte. 

DELEGACION

Recientemente un delegacion di Aruba presidi pa Minister di Turismo Dangui Oduber a reuni cu JetBlue na New York. Anualmente ta tuma e tempo pa reuni cu socionan clave, unda por, y a combina e reunion aki cu un serie di otro reunionnan.  

JETBLUE SU HISTORIA CU ARUBA

JetBlue a cuminsa bula pa Aruba na aña 2006 cu vuelonan for di Boston. Awe, 11 aña despues, JetBlue a crece y bira un di e socionan strategico mas grandi pa Aruba, contribuyendo grandemente na nos industria turistico, percurando pa buelo for di mercadonan clave manera New York y Boston, como tambe percurando pa mas diversificacion cu buelo for di Fort Lauderdale. JetBlue ta ofrece “non stop” flights di tres diferente gateways Boston, New York y desde 2017 Fort Lauderdale. Na 2017 y 2018, Jetblue a sigui expande capacidad cu introduccion di buelonan adicional y buelonan cu nan servicio “business class” pa medio di nan producto ‘JetBlue Mint Premium’ cu ta opera cu un avion mas grandi - un Airbus 321 (Business and Coach).