Gobierno no ta na altura di deadline pa diaranson di comision CAN

ORANJESTAD – Gobierno no ta na altura di un deadline poni pa diaranson merdia 12’or di Comision Accion Nacional. Por lo menos no segun minister Otmar Oduber segun e la bisa NoticiaCla.com diamars mainta. Oduber a topa cu prensa pa informa cu e mesun mainta nan a duna e lider di e comision CAN, esta Hendrik Tevreden, tur informacion cu a wordo pidi siman pasa diahuebs anochi durante nan encuentro. Pero ora cu NoticiaCla.com a puntra Oduber si esaki ta nifica cu no tin ultimatum mas, Oduber a mustra cu e no tabata na altura di esaki. NoticiaCla.com a tuma contacto cu sr Tevreden, pero no tabata exitoso diamars atardi ainda.

Entre documentonan cu gobierno a comparti cu CAN diamars mainta, ta inclui jaarrekeningen, presentacionnan haci pa WEB y Elmar. Pero pa motibo cu no a localisa sr Tevreden for di diabierna ultimo, ta te diamars mainta a bira posibel pa intercambia y duna CAN, e documentonan pidi. “Sr Tevreden tabata ‘tevreden’ cu e loke e la haya” Oduber a sigura NoticiaCla.com. Mientrastanto Oduber ta premira cu posiblemente diaranson of mas tarda diabierna awor, lo e comision haya un carta cu un contesta ‘preto riba blanco’, riba e peticion haci referente revocacion di tarifa di coriente.