Gradus: Semper CAft a controla gobierno(nan) di Aruba manera mester ta

ORANJESTAD – Semper CAFT (Colegio di supervision financiero di Aruba) a controla gobierno(nan) manera mester ta. Asian e presidente di e colegio, Raymond Gradus a sigura NoticiaCla recientemente den un entrevista exclusivo. E impresion como tal cu a haci otro, no ta cuadra. Segun Gradus den pasado tambe a alerta gobierno di Aruba riba e situacion critico financiero di e pais. E raiz di e pregunta ta riba e critica di gabinete Wever Croes cu semper a trata Aruba su gobierno (anterior) cu un handschoen di felpa mientras awor kier baha pisa riba e gabinete anterior. Pues cu antes no a actua y diripiente awor kier core actua. E presidente no a mira necesidad pa bay den detayes indicando cu e no ta di acuerdo cu e ponencia. “Mi no ta mira e necesidad pa duna un comentario riba cada situacion specifico di pasado” Gradus a contesta e portal aki den un forma cortico. 

YIUNAN TA HEREDA DEBE

Gradus durante un conferencia di prensa siman pasa, a mustra cu debi na e situacion nos futuro generacion ta bay paga pa e debe cu Aruba a crea. A raiz di e punto aki, a surgi e pregunta pakico CAft no a cay aden y interveni, evitando e debe bira mas grandi y asina bira un peso mas grandi pa e futuro generacion, manera cu e mes a bisa durante e conferencia. “Mi no ta kere cu ta un cuestion di interveni” Gradus a contesta. Loke si ta hungando un papel segun e presidente, ta cu contrario na awor, e gabinete anterior a logra yega e norma (y e gabinete awor no a haci esaki). Di otro banda Gradus ta admiti si, cu e gabinete anterior a logra esaki a base di ayudo incidental. “Y e punto ey tambe ta un di e razonnan cu nos tabata skerpi riba e asunto di RdA” Gradus a bisa, purbando di ta mas efectivo.

LEY LAft

Den un entrevista anterior cu e presidente anterior, tambe NoticiaCla a atende e punto aki. E tempo ey e presidente Age Bakker a bisa cu e ley no ta specifica con mester yega na e norma. Pues basta e gabinete yega na e norma, sea ta cu forma incidental of no, ta suficiente cu e colegio di supervision no por haci nada otro cu aproba e presupuesto pasobra ‘a logra yega e norma’. Bek pa e presidente awor, Gradus ta bisa cu e no tin e impresion cu den pasado CAFT no a hunga e papel cu nan lo mester tin, esta di actua ora cu mester. Scucha e entrevista AKI.