Aruba ta haya prome Fonds op Naam, Fonds Eduardo de Veer

ORANJESTAD - Manera conoci, Prins Bernhard Cultuurfonds Caribisch Gebied (PBCCG) ta un fondo cu ta cubri tur seis isla den Reino. E oficina principal di Prins Bernhard Cultuurfonds ta situa na Amsterdam y ta for di Hulanda PBCCG ta ricibi fondonan anual pa subsidia proyectonan riba e 6 islanan hulandes.

Prins Bernhard Cultuurfonds conoce diferente asina yama Fondsen op Naam, esaki ta fondonan cu meta specifico pa cubri un parti specifico riba tereno cultural, scientifico, of di cuido/proteccion di naturalesa. Aruba asina a conoce su prome Fonds op Naam, y esaki ta Fonds Eduardo de Veer. Como cu De Veer ta aprecia musica di piano hopi, a scohe pa piano y strijkinstrumenten.

Ainda ta corda e obsequio na occasion di celebracion di 18 di maart y e apertura di Plaza Padu na 2017 den forma di un concierto di Raul Di Blasio! E forma di sostene e desaroyo riba tereno musical ta di crea un asina yama PianoLab. E PianoLab ta situa den edificio "Rialto", antes conoci como un di e cinemanan di famia De Veer. Aki 8 studiante (y adulto) pareu por practica via un sistema nobo cu koptelefoon.

E forma cu lo opera e Pianolab aki ta en cooperacion cu e docentenan di piano y di viool. Hunto lo dileana e miho procedura pa esnan cu mas mester y cu lo sa di haci maximo uso di e oportunidad aki. E meta principal ta pa brinda e hoben cu ta destaca den piano un oportunidad pa practica piano mas tanto sin tin gasto halto envolvi. Ta trahando duro pa cuminsa cu soft-opening den vakantie grandi benidero den forma di un summer-piano-camp. E deseo ta pa den futuro cercano habri un Pianolab na San Nicolas tambe.

Mundo cultural ta aplaudi grandemente e iniciativa di sr. De Veer y ta spera cu mas Fondsen op Naam lo conoce luz di dia na Aruba. Tin scarcedad di fondo pa desaroyo cultural riba diferente tereno y Prins Bernhard Cultuurfonds Caribisch Gebied ta activamente sondiando mas Fondsen op Naam riba e 6 islanan. Pa mas informacion chek e website di PBCCG of mail alivaro@hotmail.com.