Knops: No tin cifra exacto di cuanto Venezolano tin na Aruba

DEN HAAG – No tin cifranan exacto di cuanto Venezolano tin na Aruba y cuanto a biaha ultimo añanan. Asina Secretario di estado Hulandes pa Asuntonan di Reino, Raymond Knops a contesta parlamentario Hulandes Andre Bosman awe. Bosman na mei a manda un carta pa Bosman, primordialmente riba e supuesto declaracion di prome minister Wever cu ‘Aruba ta birando un di dos Siria’un articulo di e corant hulandes NRC Handelsblad cu a bira controversial. Knops ta admiti den e carta na Bosman tambe, cu tin un diferencia di opinion entre Wever y NRC over di e declaracion ey.  

CANTIDAD DI VENEZOLANO

Den e mesun carta, Bosman a puntra clarificacion riba cifranan cu NRC a usa di NHCHR cu lo tin 20.000 Venezolano cu ta na Aruba. “Mi no sa di cifranan concreto riba e cantidad di Venezolano cu a biaha ultimo añanan pa Caribe Hulandes (e carta di Bosman ta papia specificamente di Aruba y Corsou)” Knops a cuminsa na bisa. “Si mi sa cu tin varios calculacion ta circulando di cual mi no conoce e base real, y como tal mi no por usa esaki sin mas” e mandatario ta sigui bisa. Aki e ta referi tambe na e cifra astronomico di 20.000 Venezolano cu ta e cifra cu UNHCR ta usando. Knops ta admiti si cu durante un reunion di dia 30 di mei ultimo, e la haci mencion cu no ta awo sino ta basta tempo caba tin Venezolanonan ilegal riba islanan ABC. Aki e ta referi na e fenomeno unda cu Venezolanonan ta yega Aruba legal, via aeropuerto pero cu nunca mas no ta bolbe nan pais. “Como tal, nos bista ta keda cu ta trata aki di migrantenan cu ta biaha pa e islanan pa motibonan economico (y no politico)” Knops ta sigui bisa. Recientemente e portal aki a compronde inoficialmente di fuentenan di autoridad Venezolano cu e cifra cu UNHCR ta menciona di 20.000, no ta cuadra cu realidad pasobra no tin asina hopi Venezolano riba Aruba.

INVERVENCION

Den e mesun rosea, Knops ta bisa tambe cu gobierno Hulandes ainda no ta mira motibo pa spera un fluho masal di Venezolano pa islanan ABC. “Dado momento autoridad di Aruba mes no por maneha e yegada di migrantenan, Hulanda semper lo ta dispuesto pa ofrece apoyo” Knops a bisa, refiriendo si na apoyo logistico envez di placa. A sigura Bosman cu Aruba y Hulanda tin contacto estrecho pa cu e medidanan cu por tuma. “Aruba ta liber pa haci un peticion di ayudo, si sosten adicional ta necesario y desea” Knops ta finalisa bisando.