FCCA y gobierno a firma acuerdo pa traha casnan social

ORANJESTAD - Otro luna ta cuminsa construccion di casnan social y na un prijs hopi mas abou. Durante di un rueda di prensa minister encarga cu Infrastructura y Medio Ambiente Otmar Oduber a a anuncia convenant cu a wordo cera entre FCCA y Pais Aruba. E mandatario a remarca cu desde cu a asumi e responsabilidad como e ninister encarga cu e aspecto di vivienda, un di e metanan tabata pa crea un relacion nobo cu FCCA como partner di Gobierno di Aruba.

META

Tin casnan cu lo wordo entrega den diferente bario e aña aki. Lo finalisa 36 cas na Savaneta, otronan cu ta cuminsa e aña aki tambe ta: 14 cas social na San Nicolas, 36 cas social na Tanki Leendert, Sta. Cruz, y na Hato tambe tin 12 cas ta wordo construi. ‘E meta no ta pa crea barionan atrobe di casnan social, manera cu a conoce den pasado. Contrario na esaki, e maneho ta pa distribui e cantidad di casnan social den diferente ‘verkavelingsplan’. Pa no crea barionan cu por bira un problema den futuro. E proyecto di mas grandi cu tin ta na Kiviti (80 cas), cual ta un di e excepcionnan. E motibo pa esaki ta teniendo na cuenta e necesidad cu tin pa cas social y e oportunidad cu tin pa esakinan wordo construi na Kiviti’. Di e forma aki Poco poco ta logrando e meta cu a pone, cu kier logra construi 200 cas social pa aña. Conhuntamente cu FCCA, ya caba a cuminsa combersa riba kico ta bay pasa proximo aña y di e posibilidad cu tin pa esakinan tuma luga na diferente otro sitio rond Aruba, pa asina cu drenta 2019 por inicia cu e procesonan aki.