Wever: No a determina norma y autoridad nobo pa CAFT pa 2019

ORANJESTAD – Pa 2019 no tin normanan nobo stipula ainda riba cual e colegio di supervision financiero CAFT mester actua. “Mi ta spera cu nos keda cla pronto cune” Prome minister di Aruba, Evelyn Wever Croes a bisa NoticiaCla. E protocol nobo lo conduci na cambionan den e ley di LAft, cu ta e ley cu ta duna CAFT e poder necesario y ta stipula e normanan riba cual CAFT tin cu supervisa gobierno y parlamento di Aruba. Pero e asunto di poder di CAFT (cu ta un problema pa e fraccion di MEP) na e momento aki no ta algo cu gobierno a pensa riba dje ainda, segun Wever a sigura NoticiaCla. “Nos tin cu papi’e” Wever a bisa.

PODER DI CAFT

E raiz di pregunta di NoticiaCla awe mainta tabata basa riba e discusion cu fraccion MEP tin riba e autoridad di CAFT riba Parlamento, y cu nan lo acepta esaki mas y kier mira cambio den e protocol. “ Berdad ta cu nos ta evaluando cua ta e cambionan cu nos mester bay trece den e ley di LAFt cu tin cu pasa Parlamento prome cu fin di aña” Wever a bisa. Eynan lo tin cu determina si lo cambia e poder of autoridad cu CAft lo haya den 2019.

SITUACION ACTUAL

CAft su presidente Raymond Gradus a mustra diabierna cu a base di e ley di LAft, CAft por actua y esey ta entre otro, pa atende parlamento di Aruba si nan ta haya cu e no ta cumpli cu normanan stipula. E punto aki no ta aceptable pa e fraccion di MEP, cu ta sinti cu CAft tin poder riba parlamento, y cu den cierto forma ta kita autonomia di parlamento. Riba e tema aki, e fraccion di MEP kier mira cambio. Segun minister di finanza Xiomara Ruiz Maduro, e cambio lo bin na September/October den e asina yama najaars nota.