Caribe Hulandes y Hulanda a firma acuerdo riba tereno medico

ORANJESTAD - E mandatarionan di Aruba, Corsou, St Maarten y Hulanda tawata presente na un “vierlandenconferentie” recientemente pa yuda sostene otro pa mehoracion di e calidad di cuido medico. Tambe a haci palabracionnan tocante programanan di prevencion, colaboracion entre hospitalnan, medicamentonan, cursonan pa profesionalnan y intercambio di informacion. Di e manera aki e paisnan ta forma cooperacion mutuo ariba e areanan di biba saludabel, deporte y movecion.

OPTIMALISA CUIDO MEDICO Cuido medico mester ta completamente optimalisa na momento cu e paisnan caribense den reino Hulandes haya su mes confronta cu un evento catastrofico manera horcan Irma. Esaki ta importante pa por yuda e victimanan mas lihe posibel, cu cuido medico di calidad, sin perhudica e cuido medico na pashentnan existente, cu suficiente medicina den stock y cu personal cu ta wordo entrena regularmente. Pa por logra esakinan, Aruba, Corsou, Hulanda y Sint Maarten ta bai traha mas estrecho cu otro. Bou di presidencia di Sint Maarten, e ministerio di Salubridad Publico, Bienestar y Deporte, lo bai trece padilanti e areanan cu mas ta bai rekeri esfuerzo. Esaki ta un di e palabracionnan haci entre e 4 mandatarionan den Reino na Willemstad Corsou kendenan ta Minister Dangui Oduber (Aruba), Camelia-Römer (Corsou), Staatssecretaris Sr.Blokhuis (Hulanda) y Minister Lee (Sint Maarten).

CAMPAÑA DI CONCIENTISACION

Aruba, Corsou, Hulanda y Sint Maarten ta bai traha fuertemente ariba campañanan di concientizacion pa entre otro reduci humamento, problemanan di obesidad y abuso di alcohol. Esaki ta rekeri atencion specifico pa por mira kico ta funciona bon na cada un di e 4 paisnan menciona den Reino. Por ehempel, na Hulanda nan ta huma mas cu na e paisnan caribense den reino. Un otro ehempel ta cu e hende muhenan caribense ta huma y bebe menos cu e hende hombernan pero ta sufri mas di obesidad y ta haci falta di movecion.

CUIDO PA MUCHA Y HOBENNAN

E paisnan lo bai sondia hunto pa un miho plan di cuido di mucha y hobennan cu ta den necesidad. Lo bai pone extra atencion pa combati abuso di mucho y preveni embarazo hubenil. Cu prioridad lo bai mira na mehora e cuido di salud mental di muchanan y hobennan, cuido social y emocional, adiccion y como tambe mehora e cuido di muchanan y hobennan cu limitacion. Aruba y Corsou ta e prome paisnan den Reino cu lo bai cuminsa cu esakinan.