CAFT: Mantene kiebro di e tendencia di aumento di gasto di personal

ORANJESTAD - Gobierno mester mantene e kiebro di e tendencia di aumento di gasto di personal manera nan a presenta aworaki. Asina presidente di e colegio di supervision financiero CAFT, Raymond Gradus a bisa NoticiaCla den un entrevista priva diabierna. , ‘ E recomendacionnan (haci pa CAFT) a wordo sigui suficiente pa e presupuesto 2018, cu ta nifica cu e (menasa pa un ‘aanwijzing) ta bari for di mesa’ . Esey tambe Raymond Gradus, a confirma pa NoticiaCla diabierna.

RETO TA SIGUI

Esey no kier men cu tur cos ta ok si, Gradus a sigui bisa. “Tin hopi reto dilanti porta pa Aruba” Gradus a sigui bisa e portal. Entre nan, e preocupacion mas grandi ta e debe estatal di Aruba. “E debe ta casi 90% y e di berdad e mester baha. Y den presupuesto 2019 mester tin pasonan grandi caba pa reduci e deficit”, e presidente a sigui bisa.

AYUDO INESPERA Gradus a papia tambe riba palabracionnan cu mester tuma lugar riba e asunto di entradanan inespera, osea e asina yama ‘incidentele meevallers’. Como ehempel, Gradus ta sugeri entradanan inespera cu mester wordo uza pa paga e debe di pais Aruba y no bay pa cubri otro cos. “Esey ta un remarke importante cu mi kier haci”. E siguiente paso ta e añanan 2019,20, y 21.

GASTO DI PERSONAL

Remarcable ta segun Gradus cu pa prome biaha ta wak un tendencia di reduccion di gasto di personal di 12 miyon, siendo cu tur e añanan prome, esaki tabata subi. Pero ta importante pa e tendencia bon aki, continua tambe. A puntra Gradus si tin medida cu e ta dispuesto pa acepta di gobierno, cu no ta resulta den retiro di personal. Gradus a mustra cu esaki ta dificil pa bisa, pasobra gobierno di Aruba ta dicidi con nan ta atende cu e problema di gasto di personal. “No ta pa nos di e colegio financiero (pa bisa). Loke si mi ta haya importante ta pa mantene e kiebro di e tendencia di aumento di gasto di personal, cu e tendencia manifesta su mes realmente den 2018, pa presenta un reduccion aun mas grandi” Gradus a sigui bisa. Y enberdad esey segun Gradus,- contestando pregunta di NoticiaCla -, ta nifica cu nan por haya nan mes den un plan multiannual di reduccion di personal, envez di inicialmente uno cu ta basa completamente den 2018. Algo cu inicialmente CAFT no tabata positivo pe. Scucha e entrevista AKI.