Gradus: Caft enberdad tin poder riba parlamento si no cumpli cu normanan

ORANJESTAD – E colegio di supervision financiero di Aruba den cierto forma enberdad tin e ultimo palabra riba presupuesto di Aruba, y no Parlamento. “Nos tarea ta describi den e ley di LAFT (ley cu ta duna e colegio di supervision financiero di Aruba CAFT, e autorizacion pa haci su trabou)” presidente di e colegio, Raymond Gradus a bisa NoticiaCla diabierna ultimo. Raiz di e pregunta di NoticiaCla, ta e reclamo di politiconan local siman pasa cu CAFT lo tin mas autoridad cu parlamento y cu esey no ta aceptabel. Aki Gradus a duna su interpretacion y con mester mira e ‘poder di CAFT’ compara cu esun di parlamento.

PODER DI CAFT vs PODER DI PARLAMENTO

“Parlamento ta determina e presupuesto, berdad. Esey ta e derecho di parlamento di Aruba” Gradus a cuminsa na splica. “ Pero nos (CAFT) ta wak (e presupuesto) desde nos responsabilidad, y esey ta nos punto di salida” Gradus a sigui bisa. Y si tin discusion riba e asunto di poder, Gradus ta sigura cu ta gobierno di Aruba y Hulanda mes a haci palabracion aki riba unda cu a duna e colegio cierto instrumento pa usa si parlamento di Aruba no tene nan mes na dje. Instrumentonan cu ta desemboca den ‘recomendacionan’ di e colegio, cu si nan no wordo tuma, e colegio por sugeri medida contra Aruba, pa medio di un ‘instruccion’, of ‘aanwijzing’.

ULTIMO PALABRA

Mientras cu Gradus ta admiti cu e por zona cu nan (CAFT) tin ultimo palabra si nan (esta CAFT) bisa cu e presupuesto no ta cumpli, esey no kier men cu CAFT ta bay determina exactamente kico y con, pero si, cu parlamento mester a cumpli cu e normanan. “Y nos recomendacionnan ta mustra riba esey, y por finalmente resulta enberdad riba cumplimento segun deseo di e organo consultativo” Gradus a sigui bisa mustrando cu de facto CAFT enberdad tin e ultimo palabra y no parlamento. Scucha e entrevista AKI.