Gobierno a permiti AVP pa tene actividad toch den MFA Noord

ORANJESTAD – Partido AVP por tene su actividad informativo diamars anochi den MFA na Noord. Asina prome minister Evelyn Wever a informa e partido diabierna atardi y a confirma esaki despues cu NoticiaCla tambe. Cu e aprobacion aki, un caso sumario cu e partido berde a entama, a caduca tambe. E caso tabata poni pa tuma lugar 3’or. A opta pa desvia di e regla cu gobierno no ta acepta actividadnan politico ‘pasobra bo persona no tabata na altura di esaki’, Wever a bisa abogado di e partido, Hans Sjiem Fat den un carta. A mustra tambe cu e carta cu e hefe di e MFA, prohibiendo e evento pa tuma lugar, a keda revoca tambe. Loke a hala atencion ta e multa di 1 miyon florin cu e partido a pidi huez impone si gobierno stroba nan di tene e evento.

E CASO

Manera e portal aki a raporta caba, e siman aki e partido berde a haye confronta cu un decision di e director di e MFA, cu, despues cu a paga y ricibi autorizacion pa tene un anochi informativo, a bin tende di e mesun persona cu esey no por mas. E partido no a perde tempo y a dicidi di entama un caso sumario diahuebs contra gobierno, mirando cu nan a haci palabracion caba y cu e evento mester sigui. Diabierna mainta, corte a informa cu e caso ta poni pa tuma lugar 3’or di atardi.

WEVER

Den un reaccion diabierna atardi laat, Wever a bisa e portal aki cu e la tende te laat di e caso, diabierna mainta 11’or y mei. E mandatario a keda straña cu e persona encarga di MFA a duna autorizacion conoci, pasobra ta conoci cu no por tene actividadnan politico den e centro ey. “A bisa e ora pa ban considera esaki e ultimo eror di gabinete anterior den maneho. E maneho ta cu ora cu ta trata di grupo cu kier organisa algo informativo, ta apoya esaki. Pero si ta politica, no (por tuma lugar) den un departamento di gobierno of edificio di gobierno. E hecho cu otro partidonan politico (RED y RAIZ, red) a tene actividadnan politico den un edificio di gobierno anteriormente, no tabata conoci pa Wever. Y ta pasobra otro partidonan a tene un actividad asina, a dicidi di honra e peticion di partido AVP.

DOBLEGA PA PRESION

E hecho cu AVP a bisa na prome instante cu gobierno a dobla pa presion, no ta molestia e prome mandatario. ‘Ta depende con bo ta wak e. Si sr Eman ta drumi miho awe nochi pasobra e ta kere cu mi a doblega, mi ta contento cu tin un ser humano ta drumi miho awe nochi” Wever a bisa. Pa loke ta e 1 miyon di multa, Wever a bisa cu ora cu huez a habri e session, a presenta e carta di gobierno aprobando e permiso, pues cu no tin mester di caso. Pero si a duna e partidonan oportunidad ta pa check e gastonan cu a keda incuri pa e caso. “Esey ta normal” Wever a bisa. E abogado di AVP e momento ey a bisa cu nan kier nan gastonan cubri, cu gobierno a acepta. Pero e abogado a insisti pa e carta wordo trata. Abogado a mustra huez cu nan tin miedo cu ta bay lock e porta cu candal y pa duna AVP autoridad pa tin polis pa evita esey. Huez sinembargo, segun Wever, a bisa cu e no tin ningun duda den prome minister cu e lo stroba e evento.