Romero: Fast Ferry ta bira pilar economico nobo pa Aruba

SAN NICOLAS – E proyecto di fast ferry mester bira e pilar economico nobo pa Aruba. Asina minister di transporte Chris Romero a bisa e siman aki. E hecho cu e ta bira un pilar economico nobo ta door di crea un comercio directo entre Aruba, Boneiro y Corsou.

PRIORIDAD

E proyecot ta un di e prioridadnan inmediato di gobierno, segun Romero, y lo percura pa haci esaki bira realidad den un tempo relativamente corto. Pa e proceso cuminsa cana su caminda, Romero a opta pa trece for di Hulanda e experto di Fast Ferry, Ton Janssen, y asina hunto cun’e sinta cu tur stakeholders concerni y asina scucha nan deseonan y sugerencianan pa realisacion di e gran proyecto aki.Tambe lo sinta na mesa cu departamentonan gubernamental cu lo bay ta directamente involucra cu e Fast Ferry, entre otro Inmigracion y Douane, pa asina por tin un idea mas concreto di e controlnan cu mester implementa.

CLARIDAD

E titular di Transporte ta convenci cu mester bin mas claridad pa cu e proyecto di Fast Ferry y den cuadro di esaki e lo bay Parlamento pa duna informacion y tambe pa scucha sugerencia. Den conseho di Minister tambe lo trata e proyecto di Fast Ferry di un manera mas profundo y cu prensencia di e experto Ton Janssen, pa duna claridad na cualkier duda of pregunta cu por surgi.