Valero ta admiti posibel desmantelacion di refineria na Aruba

SAN ANTONIO – “ Tin un posibilidad cu ta desmantela e refineria Valero na Aruba ”. Asina vocero di e compania madre Valero, Bill Day a confirma na NoticiaCla.com diamars mainta. Mientras cu e no ta familiar cu e formulario cu ta circulando di peticion pa aplica pa bid pa e desmantelacion, e ta admiti cu Valero lo desmantela si no haya benta pa e refineria den tres aña di tempo. No ta conoci ki tempo e periodo di 3 aña ta vence, pero e indicacion ta cu esaki ta na 2015.

Segun informacion cu NoticiaCla.com tin y cu Day a confirma, tin un acuerdo di erfpacht cu Valero a sera cu gobierno di Aruba, cu ta stipula cu e refineria lo mantene e unidadnan intacto y continua buskeda pa un cumprado pa e refineria. “Pero si despues di e tres añanan no haya un cumprado, y Valero dicidi pa no opera e refineria mas, Valero ta obliga pa desmantela y prepara e sitio pa otro uso”. Mientrastanto, e ta continua cu un buskeda pa e refineria.

Valero na juli ultimo a informa publicamente cu e propiedad na Aruba lo percura pa un perdida miyonario y a suma esaki na 62 miyon di perdida, como consecuencia di e paro di refina petrolio. Nan ta yame tambe un ‘asset retirement obligation’.

Mientras cu Valero ta desmenti conocemento di e formulario (lesa e formulario aki) (manera indica mas ariba), NoticiaCla.com a ricibi un copia di dicho formulario, cu ta di e compania Arcadis. E compania ey, ta papia na nomber di Valero,(lesa e mail aki) cu ta pidi cualkier compania pa completa e formulario cu e informacion necesario prome cu 27 di october, 2014. E meta di e formulario ta pa haya un lista di contratista cu por ‘bid’ pa e desmantelacion di e refineria. Ta papia di desmantelacion cuminsando na 2015 y terminando na 2017, esta tres aña. E formulario ta haci mencion di tur e trabounan posibel cu e bid por inclui. (mira e documento y formulario aki)