Oduber: Directiva Parke Arikok a haci intento di ‘coup’

ORANJESTAD – Desde awe mainta Parke Arikok ta manera un barco sin timon. E director di e parke Natasha Silva mes a confirma esaki awe mainta den un carta na e minister encarga Otmar Oduber. E directiva di 4 persona, manera ta conoci caba, a entrega su retiro ‘en bloc’ per direct un dia prome y awe mainta Oduber a reacciona yamando e asunto un ‘coup’ di e directiva, durante un conferencia di prensa. Silva mientrastanto awe mainta a pidi intermediacion di e minister pa por resolve e situacion urgente aki.

SITUACION

E mandatario durante un conferencia di prensa a repasa e trayecto di reunion y corespondencia cu ta tumando lugar for di maart caba, y cu segun e mandatario, tabata canando den un bon ambiente y transparente. “Ningun momento nos a ricibi un ‘brandbrief’ di nan” Oduber a sigura prensa awe mainta. Tabata diaranson mainta tempran e mandatario a ricibi un mail di un di e miembronan di directiva pa un problema tecnico y cu por tin tardanza pa keda cla. Atardi caba riba dia 19 di juni, e ta ricibi un carta fecha un dia prome (18 di juni), cu e directiva ta retira ‘en bloc’ pa motibonan politico. Pues algun ora despues cu a ricibi un otro carta cu no a duna ningun indicacion di e situacion ey.

TRAYECTO

E mandatario a cuminsa prome na splica e problema cu a surgi na fin di aña pasa ora cu e directiva a opta pa cambia statutonan di e fundacion, sin informa gobierno. Segun Oduber, e cambionan tabata hopi ‘ingrijpend’ cu ta cambia e caracter di e operacion di e fundacion pa cual e la wordo lanta.

CORTE

Aworaki e situacion ta cu corte lo mester cay aden pa e asunto di nombra hende pa un directiva nobo, pero no ta conoci cuanto tempo e proceso ey lo cana, ya cu e minister en cuestion no por a duna contesta riba esey. Por lo pronto, e parke ta keda sin maneho, y e trahadornan rabia.