Gobierno mester contesta C.A.N. mas tarda diaranson merdia

ORANJESTAD – Gobierno tin te diaranson merdia 12’or pa bin cu un contesta riba e aumento di tarifa di coriente. Si pa e ora ey no tin contesta, Comision Accion Nacional hunto cu otro stakeholdernan, lo evalua nan siguiente pasonan. Esey e comision a manda bisa gobierno pa medio di un carta dialuna (lesa e carta aki) Nan no ta bisa kico e pasonan aki ta. "Nos lo fiha e punto ey den nos reunion despues di ricibi e contesta" Hendrik Tevreden, como  lider di CAN, a declara na NoticiaCla.com dialuna anochi. A compronde tambe for di un di e stakeholdernan cu ta miembro di e comision di 7, pa prepara pa ‘mas entre overtime pa polis’, mas riot comando, ‘pasobra nos ta bin pa boso’. Asina un di e miembronan di e grupo di 7, cu ta considera como un 'stakeholder' , Micheal Williams a declara na radio dialuna merdia. Esaki a duna indicacion pues cu nan ta preparando un otro manifestacion, aunke cu Cuerpo policial siman pasa ainda a sigura cu no tin ningun otro manifestacion planea mas.

E carta cu C.A.N. a manda dialuna pa gobierno, ta repasa e susesonan di e ultimo lunanan, cu ta basicamente referi na falta di accion di parti di gobierno, como resultado di dos diferente manifestacion. Tanto e manifestacion na september, di grupo di 7 como esun ultimo di CAN, siman pasa diaranson a keda sin un contesta di gobierno. Como tal nan ta sinti cu mester pone mas presion riba gobierno, pa cumpli cu e promesa di ‘zo spoedig mogelijk’, manera cu e comision a tende diahuebs anochi for di gobierno despues di nan reunion cu CAN. Te awe, ainda no a tende ningun contesta. Foto di archivo ta di e reunion entre CAN y gobierno siman pasa diahuebs 2 di october.