Ministernan a topa cu studiantenan pensa pa studia na Hulanda

ORANJESTAD / DEN HAAG – Durante su bishita di trabou na Aruba recientemente, Minister Plenipotenciario Guillfred Besaril, hunto cu su colega Minister di Enseñansa Rudy Lampe y Departamento di Enseñansa a organiza un encuentro pa hobennan cu tin e intencion di bay studia na Hulanda. Mas cu 400 studiante hunto cu nan mayornan a presenta den e auditorio di Colegio EPI pa asina ricibi informacion di Arubahuis y di Departamento di Enseñansa tocante e periodo di preparacion prome cu nan estudio. Arubahuis a duna un presentacion extenso riba locual e studiantenan por spera na momento di yega Hulanda pa loke ta trata servicionan di Arubahuis.

ARUBAHUIS

James van der Linde di Arubahuis a informa e hobennan di e organizacionnan pa studiantenan Arubano na scolnan y universidadnan den e diferente ciudadnan na Hulanda. E organizacionnan aki ta organisa varios actividad pa ricibi e studiantenan pero tambe nan ta hopi activo durante e aña escolar. Sr. Van der Linde a recomenda tur studiante pa comunica cu e “studentenvereniging” di nan scol pa ta na altura di nan actividadnan di recepcion.

REGLA PA LENING

Departamento di enseñansa durante nan presentacion e anochi aki a recorda e studiantenan tocante e reglanan di Arubalening y e rekisitonan cu e studiantenan mester cumpli cune. Pa mas informacion tocante e deadline pa entrega documentonan di Arubalening of riba e recepcion di studiantenan na Hulanda por bay riba www.arubahuis.nl of www.ea.aw. Tambe por like e pagina di Facebook di Onderwijszaken di Arubahuis y Departamento di Enseñansa pa keda informa di cualkier novedad. Nota pa redaccion: E potretnan ta cortesia di Cas di Aruba