Casi 20 edificio di gobierno para bashi sin uso pa nan

ORANJESTAD - Actualmente tin un lista di casi 20 edificio di Gobierno cu no ta den uso. For di ministerio di infrastructura, NoticiaCla a compronde cu departamentonan DOW y DIP a hinca un plan den otro awor pa mira kico por wordo haci cu e edificionan aki. Siguientemente lo papia cu cada Ministerio y lo fiha un lista di prioridad considerando cu ta trata mas di 15 mil meter cuadra di propiedad/edificio di Gobierno cu no ta den uso na e momentonan aki.

PROME EDIFICIONAN

Lo inicia cu ex edificio di Voogdijraad y Uncle Louis Store como e promenan pa wordo renoba. E plan ta pa pone un suma pa mantencion di edificionan di Gobierno den presupuesto di departamentonan y cu e mantencion ta cay bou responsabilidad di e director, pa evita cu den transcurso di añanan e lista di edificionan cu no ta den uso/ bandona ta sigui crece.