Ridderstap: Cu Lotto online, a bin un grupo nobo acerca cu ta cumpra lotto

ORANJESTAD – Un siman despues cu Lotto a introduci e posibilidad pa cumpra lotto ‘online’, e persona responsabel pa mercadeo y publicidad Damaris Ridderstap ta contento. Segun Ridderstap, e prome reaccionnan tabata hopi positivo. Mes momento e ta conciente si cu ta hopi tempran pa tin un bon bista di e impacto. Lo dura por lo menos 2 luna prome cu nan por bisa berdaderamente kico e impacto tabata, pa midi con grandi e impacto tabata. Pero e mercado nobo a nace y ta creciendo.

KINDERZIEKTES

Segun Ridderstap, hopi biaha un producto nobo of servicio nobo ta sali y tin cu maneha e asina yama ‘kinderziektes’, y na caminda cos ta drecha. Den caso di Lotto, a sigura cu prome cu lanza e producto, cu tur kinderziektes ta afo. Y esey a causa tambe un retraso chikito den introduci e producto. Pero awor por bisa cu certeza cu no tin ningun fayo y cu e producto ta coriendo bon.

ID

Un di e ‘problemanan’ cu cierto clientenan ta confrontando, ta e asunto di valida nan ID. A pidi pa sea scan of saca potret di nan ID y upload esaki, of trece esaki pa oficina di Lotto. Aki ainda hende sea no ta compronde bon con pa haci esaki corecto. Y esaki ta tarda e proceso di registro pa nan. Cierto hende ta saca potret di nan mes, envez di nan ID, of ta saca e potret cu no por usa etc.

SHIFT MERCADO

Un pregunta di NoticiaCla ta cu si a nota e shift di hende cu awor diripiente no ta bay cumpra lotto fisicamente mas, sino ta busca esaki online. Ridderstap a mustra cu esaki no ta e caso, sino mas bien por papia di un mercado ‘nobo’ cu a bin acerca. Esaki ta nifica cu e hendenan aki ta uza y cumpra lotto pa prome biaha y pues a bira un grupo ‘extra’. No ta asina cu diripiente hende a dicidi di shift di un grupo pa otro, segun Ridderstap. Pero esaki por cambia, y dentro di dos luna, por mira cu certeza ki impacto e lotto online por tin.

CRITICA Un di e criticanan cu tabatin inicial, ta cu tabatin e percepcion cu hendenan lo stop di bay cumpra lotto na e tiendanan, creando perdida di entrada pa e hendenan. Como tal, cu cierto preocupacion hendenan a cuminsa critica cu awor lotto online ta kita trabou y pan di otro hende. Pero esaki no a resulta asina, manera a informa anteriormente, sino mas bien tin un grupo ‘adicional’ cu awor ta cumpra lotto. E potret ta di lansamento di e proyecto lotto online.