Islanan Caribense man na cabez pa crisis migratorio Venezolano

ORANJESTAD – Islanan den Caribe ta man na cabez pa loke ta e situacion di Venezuela. Asina un raportahe di e portal ‘political insights’ ta bisa, refiriendo na e organisacion CARICOM indicando cu e no ta ekipa pa atende cu e problema di refugiado Venezolano. Aki e ta relata cifranan di Venezolanonan den Caribe, incluyendo Aruba y ta haci mencion cu Aruba tin 20 mil Venezolano. Algun tempo atras, inoficialmente NoticiaCla a compronde cu e cifra aki a keda disputa pa autoridad Venezolano. “E cifra no ta berdad” un fuente cerca di e instancia a sigura e portal aki. Oficialmente tin hopi menos Venezolano riba nos isla. Durante e ultimo eleccion presidencial Venezolano, e grupo oficial registra pa vota, tabata menos cu 1500. Pues e cifra exacto di cuanto Venezolano tin na Aruba, ta keda un duda.

MIEDO

E articulo ta bisa cu numbernan di Venezolano drentando e islanan, a aumenta ‘dramaticamente durante e ultimo 6 lunanan na Curacao, Aruba, Barbados, Repblica Dominicano, Grenada, Trinidad and Tobago, Guyana y Suriname. Ta haci mencion tambe cu e bisiñanan directo di Venezuela manera Colombia y Brazil tin e problema di mas grandi, unda cu a conoce un aumento di 600% di Venezolano crusando e frontera y cu esaki ta un aumento di ‘apenas’ 2017 pa awor.

DIFICULTAD

Loke ta hala atencion ta cu awor cu Venezolanonan a ripara con dificil ta pa drenta e paisnan bisiña ultimo dos aña, nan a cuminsa usa tur nan recurso pa biaha pa e islanan Caribense, incluyendo Aruba.