Opinion: Un sistema di control fracasa

Opinion: Un sistema di control fracasa

Posted on 06/19/2018 2:36 pm AST | Updated on 06/19/2018 2:37 pm AST

Pa Armand Hessels

Desde comienso di Status Aparte te cu fin di 2017, patronahe politico, un administrashon financiero deficiente y proyecto sospechoso ta forma caracteristica importante di gobernashon di Aruba. Esaki a costa Aruba inecesariamente biyones di florin. Pa gran parti a financia esaki pa medio di prestamo (= creashon di debe) y economisashon den departamento importante di gobierno. Como tal, structuralmente tawata trata di malgobernashon. E pregunta ta, con esaki por a tuma luga casi sin ningun estorbo durante mas di 30 aña. Pasobra...como partner di Reino, Aruba tin un sistema di control cu mester percura cu abuso (di poder) y drispidimento di placa (casi) no por tuma luga.

Un tremendo sistema...den teoria!

Nos estado di derecho democratico ta basa riba Trias Politica cu e podernan legislativo (Parlamento), ehecutivo (gobierno) y hudicial (hues). Ningun di e pilarnan aki tin mas poder cu otro. Pesey tin un balance cu ta evita abuso di poder di parti di cualke pilar.

Pa cada tereno di maneho a elabora e sistema aki mas aleu. Pa evita cu na caminda ta abusa di e competencianan, a pone tur caminda sistema di control: e checks & balances. Por ehempel, riba tereno financiero ta basa e maneho riba e programa di gobernashon. Pa ehecuta esaki den practica, ta elabora e intenshonnan di maneho den presupuesto. Mester entrega e presupuesto dentro di un tempo stipula pa ley. Na prome luga Conseho di Consulta (Raad van Advies) ta huzga presupuesto riba su meritonan/implicashonnan huridico, financiero y socio-economico prome cu e ta bay pa discushon pa Parlamento y al fin y al cabo pa su aprobashon.

Durante e aña, Servicio Central di Accountant ta controla si tur entrada y gasto ta tuma luga segun e reglanan di entre otro Ley di Comptabilidad. Despues cu aña a termina, Controlaria General ta controla si ehecushon di e presupuesto a bay segun ley y na un manera efectivo. E ta describi esaki den su cuenta anual y ta pasa esaki pa Parlamento. Parlamento na su turno ta controla si gobierno a cumpli cu su intenshonnan manera describi den su presupuesto. Den caso di desviashon, ta yama e ministro p’e responsabilisa su mes.

 

Debi na e complehidad di maneho en general y pa estima y/of adapta e consecuencianan di maneho riba terrmino largo, gobierno ta ricibi conseho di instancia importante manera SER, Banco Central, IMF, etc. Na unda ta necesario, e ta tene cuenta cu esakinan den su maneho. Riba dje, Statuut ta duna e garantia cu e sistema aki, como parti integral di bon gobernashon (art. 43), ta funcshona debidamente. Pues, cu un sistema asina, ta dificil pa faya. Asina mes Aruba ta den problema pisa. Con esaki por ta?

Un sistema fracasa...den practica!

Problema grandi ta cu e realidad ta completamente diferente. Desde inicio di Status Aparte e sistema aki di ‘checks & balances’ ta faya completamente. Asina e diferente gobiernonan ta viola tur aña atrobe e stipulashonnan di Constitushon pa cu momento y/of forma di entrega presupuesto. Practicamente nunca ta tene cuenta cu conseho di SER, Banco Central, IMF y otro instancia di control. Por lo general,tanto gobierno como Parlamento ta neglisha tur observashon di Conseho di Consulta. Ya caba pa decada, y a pesar di petishon urgente, aña aden aña afo, e instancianan di control cronicamente ta falta personal adecua di manera cu nan no por haci nan trabou di control manera prescribi pa ley. Como consecuencia, desde 1986 Parlamento di Aruba nunca a ricibi un cuenta anual cu aprobashon di accountant y pues nunca por a trata un solo cuenta anual debidamente. Pesey nunca por a controla un solo presupuesto riba su realismo y nunca por a responsabilisa un solo ministro pa motibo di maneho fracasa. Mientras cu for di tur rapport cu cualke instancia a yega di produci, ta sali na cla cu e maneho tawata un fracaso. A pesar di e fracaso (intencional!?) aki cu consecuencia financiero enorme, gobierno di Reino a deha di coregi esaki durante decada.

 

 

E caracteristicanan principal di maneho di gobierno tras di otro

Si nos pone tras di otro e caracteristicanan principal di maneho di e ultimo 30 añanan -cu tawatin consecuencia hopi negativo pa salud financiero y socio-economico di Aruba-, nos ta mira un imagen hopi serio. Ta trata entre otro di:

Violashon structural di ley (p.e. Constitushon & Ley di Comptabilidad) pa gobierno. Presentashon structural di presupuesto irealista locual ta nifica engaño di pueblo. Legalisashon structural di ley cu a viola y di presupuesto irealistico pa Parlamento. Negligencia structural pa advertencia serio di parti di instancia oficial pa cu administrashon financiero y maneho financiero, economico y social. Negligencia structural pa consecuencia financiero di maneho cu a pone den practica (p.e. en cuanto SVB y AZV). Negligencia structural pa recomendashon importante pa mehora calidad di goberashon locual ta nifica cu intencionalmente a scohe pa mal gobernashon. Falta structural di transparencia (p.e. en cuanto financiamento di partido). Falta structural di responsabilisashon (nunca tawatin un solo cuenta anual aproba pa accountant). Cultura sistematico di manipulashon di informashon y intimidashon (cultura di miedo). Resultado general: negligencia structural di bienestar di comunidad. Esaki ta contra e promesa cu gobernante ta haci na comienso di gobernashon, esta cu nan lo traha exclusivamente pa bienestar general.

 

Un estado di derecho democratico fracasa

Con tur esaki por ta posibel? Simplemente pasobra e atenshon principal di hopi politico pa gran parti ta enfoca riba interes personal y di partido. Esey automaticamente ta trece nos riba e problema principal di nos gobierno di e ultimo 30 añanan, esta un gran falta di integridad. Esey ta sali na cla tambe ora di lesa e raport ‘Seguridad y Integridad na Aruba’ di Servicio di Inteligencia di Aruba. Pero tambe di e rapport di e reportero investigativo Tom Blickman tocante e maffia di droga na Aruba y e rapport ‘Un cuestion di Mentalidad’ di Comishon di Berdad, ademas di practicamente tur rapport di Controlaria General. For di tur esaki ta sali na cla cu en realidad e ‘trabou’ di nos politiconan a ocashona un estorbo grandi den e sistema di ‘checks & balances’ y pues tambe den e balance cu mester tin entre e podernan di e Trias Politica. Como tal, tambe a afecta seriamente e fundeshi di nos estado di derecho democratico

  • Opinion: Reactie op opiniebijdrage van Rocco Tjon

    Opinion: Reactie op opiniebijdrage van Rocco Tjon

    De fractievoorzitter van de MEP slaat de spijker op de kop met de bewering dat berichtgeving door journalisten gestaafd moet zijn door feiten. Vanwege dit uitgangspunt schrijf ik deze reactie op de ingezonden opinie van de heer Rocco Tjon naar aanleiding van een kruisgesprek dat ik voerde op NPO radio 1 op 31 juli. In tegenstelling tot wat de heer Tjon meldt, gaat dit niet over berichtgeving uit Nederland, maar vanuit Curaçao. De NOS hecht er belang aan om het nieuws zo dicht mogelijk bij de bron te garen, juist om de scepsis die overal ter wereld heerst – kennelijk ook bij de fractievoorzitter van de MEP - enigszins te kunnen weerstaan.

  • Opinion: Mi yui Po Sing Fan ta innocente

    Opinion:  Mi yui Po Sing Fan ta innocente

    Apreciabel sr Redactor. Na prome lugar mi ta grandicibo pa e espacio pa mi como mama di mi yui, Po Sing, por expresa mi mes tocante e caso di mi yui. Cu awa na wowo y un dolor inmenso mi a scucha con Juez den e caso di wayaca a sentencia mi yui na 20 anja di castigo di prizon. Ami como mama di mi yui sa cu mi yui ta innocente di tur e acusacion nan menciona. Na e inicio di e investigacion hopi cos a bai robez y mi ta di opinion cu esnan envolvi a busca y hasi envistigacion robez. No ta pasobra mi yui a duna Echabardo un lift y buske bek e mester tabata sa di e suceso aki. Pasobra ta hopi biaha mi yui sa duna Echebardo un lift y hopi otro hende mas hende den su bida. Esaki tabata algo comun pa mi yui. No ta paso mi yui a huur un auto pa Echebardo, kiermen cu mi yui tabata sa kiko e persona aki tabata di bai hasi pa cu e caso aki. Es mas e sa huur auto varios biaha pa Echebardo den pasado y sa huur pa otro hende tambe. Mi yui ta un persona cu semper a saka un man pa juda hende ora e por. Mi ta sinti cu husticia di Aruba cu tur respet, a faya y kier culpa mi yui pa sconde e berdad mes. Sra Juez, bin splica ami y mi famia, con por ta posibel cu mi yui tin tur cos den su bida, su mesun negoshi, su mesun plaka, su dos cas nan y mucho mas, kiko lo tabata su motibo pa laga comete un atraco sabiendo cu e tin tur cos y no falta nada. Nos por a scucha den corte con Echebardo a tilda e yui di e defunto y ningun musca a bula. Asina tin hopi cos bisa den corte cu no a sali den prensa y tambe cu no ta cuadra cu e realidad. Nos ta di opinion cu Sra Juez a wordu mal informa door di autoridadnan y e Fiscal concerni. Lamentablemente Echebardo a compromete su mes pa no a papia e berdad den corte. Por ultimo mi kier a remarka cu tin un diferencia grandi entre mi yui y e otro nan. Mi yui semper ta responsabel riba su mes y nunca a depende di su mama of tata. Pero e otro nan si. Nunca nos a laga sa cu nos no ta confia nos yui cu plaka. Por lo pronto te aki nan. Famia Fan.

  • Opinion: PA INTERES GENERAL!?

    Opinion: PA INTERES GENERAL!?

    pa Armand Hessels

  • Opinion: UN RST AUTONOMO?!

    Opinion: UN RST AUTONOMO?!

    Pa Armand Hessels

  • Opinion: Humilde

    Opinion: Humilde

    (PA ARMAND HESSELS)

  • Opinion: Secuencia robes

    Opinion: Secuencia robes

    SECUENCIA ROBES pa Armand Hessels

  • Powered by SETAR