No ta descarta medida adicional pa polis den caso Zinnia Croes

ORANJESTAD – “Nos ta bay haci un investigacion profundo pa wak kico a bay fout” ta e prome comentario di minister di husticia di Aruba Andin Bikker, na NoticiaCla riba e caso cu a resulta den morto tragico di e hobencita Zinnia Croes tres aña pasa. E pregunta tabata basa riba e hecho cu huez a no tabatin bon palabra pa e forma con polis a haci e investigacion riba e caso aki, y kico por haci den e caso aki.

CASTIGO DISCIPLINARIO CABA

E mandatario (manera cu e abogado a bisa den corte tambe) a ripiti cu e polis a haya un castigo disciplinario caba (baho di rango). Ademas, e mandatario a bisa cu dependiendo di resultado di e caso, kizas lo bin medida adicional contra e agente policial Vriend cu a causa e accidente na maart di 2013. “Pero nos mester duna espacio un rato, pa wak kico ta bay ta resultado di e caso” Bikker a bisa e portal aki.

CUIDADOSO

E mandatario tabata hopi cuidadoso cu su palabranan si, mirando cu ta trata cu ta un caso ‘den man di huez’ y cu e no kier influencia esaki sin mas. Bikker a bisa cu no ta husto pa e sistema hudicial ni pa e acusado tampoco, pa anticipa cosnan mientras cu huez tin cu duna su sentencia riba e caso.

E CASO

Fiscal Schwengle diahuebs mainta siman pasa a pidi 240 ora di trabou comunitario pa e acusado Jadira V, e polis cu a dal y mata e hobencita Zinia Croes tres aña pasa y kita su rijbewijs pa 2 aña incondicionalmente. Abogado di V. mientrastanto, Chris Lejuez, a pidi vrijspraak pa su cliente, indicando cu tur e puntonan treci dilanti, no tin base legal. Mientrastanto e polis, cu siman pasa a haya castigo disciplinario di KPA mes pa e caso, a bisa huez cu e ta ‘hopi sorry’ di loke a pasa pero cu esaki tabata un accidente cu ‘mi no por a evita’.