Bikker: Castigo combina di 15 aña prison/TBS ta bira 25 aña cera

ORANJESTAD – Pueblo por ta sigur cu si e sentencia cu fiscal a pidi den caso di Speeltuin pa e padrastro, cu Aruba lo ta cla pa atende cu esey. E mandatario di husticia Andin Bikker, ta referi na e hecho cu fiscal a pidi un castigo combina di prison y Ter Beschikking Stelling (TBS). Pero na Aruba y Corsou no tin e facilidad aki ainda. Pues esey lo por a bira un problema. Pero e mandatario a sigura cu pa ora cu e sentencia cay, dia 6 di juli proximo, cu lo tin un solucion pa esey.

CRITICA RIBA SENTENCIA

E mandatario a bisa tambe cu e la tuma nota di e critica cu tin riba e peticion di castigo pa e padrastro, y cu pa hopi, 15 aña no ta nada pa un crimen cu e homber (lo) a comete. Pero aki ta unda cu e mandatario a splica e parti di TBS un biaha mas, ya cu na Aruba hopi hende no conoce e concepto ey ainda, compara cu Hulanda. E castigo combina, tabata di 15 aña prison combina cu TBS. “Ora cu fiscal pidi 15 aña (di prison) y TBS (Ter Beschikking Stelling), esaki ta (nifica) minimo 25 aña (prome cu e persona por recobra su libertad). Asina e mandatario di husticia a sigura NoticiaCla durante un conferencia di prensa dialuna mainta. Bikker a splica cu pa un tratamento di TBS, e persona mester haya minimal 10 aña di tratamento, si califica cu e no ta un peliger mas pa sociedad pa e por bay liber. Den e caso di e mama di e criaturanan cu a haya un castigo pidi di 4 aña, aki tambe ta papia di un aumento di por lo menos 14 aña si e tambe haya un castigo combina. Den e caso aki sinembargo, fiscal no a pidi TBS pa e mama. Bikker a bisa tambe cu gobierno tin e tarea di cada bes evalua den casonan specifico, si nos leynan ta suficientemente actualiza. Y pesey Bikker ta bisa cu pa hopi aña e ta bringando pa bin cu un academia di ley pa por ‘actualisa’ ley.

CASTIGO PIDI

Ministerio Publico a exigi un castigo di prison di 15 aña contra Gabriel M. Un di e consideracionnan tabata cu Ministerio Publico ta haya necesario cu banda di e castigo di prison mester tambe impone un medida contra su libertad. Pa e razon aki Ministerio Publico a exigi huez pa impone un castigo di prison y e medida di TBS (terbeschikkingstelling = poni na disposicion di gobierno) cu tratamiento obligatorio (dwangverpleging).

EXPERTONAN

Expertonan riba tereno di comportamiento humano a determina cu Gabriel M. ta sufri di un disturbio di personalidad. Ademas e expertonan ta kere cu e peligro cu Gabriel M. ripiti delitonan di violencia grave ta sumamente halto, si e no wordo trata. Mirando cu Gabriel M. a nenga yudanza cu a wordo ofreci na dje den pasado y pa motibo di e peligroso cu e ta, ta indicativo pa tratele den un clinica cera. Sentencia pa e padrastro ta riba 6 di juli 2018.