Jopie Abraham: Ramoncito Booi no a gana ningun caso di corupcion

KRALENDIJK – Miembro di eilandsraad di Bonaire, Ramoncito Booi no a gana ningun caso di corupcion contra su persona. Asina ex lider politico boneriano Jopie Abraham duna como reaccion na NoticiaCla.com. E ta reacciona basa riba declaracionnan cu Booi a haci recientemente na NoticiaCla.com, cu eynan a declara cu e la gana tur su casonan den corte. Abraham ta mustra cu segun e, esta Abraham, cierto declaracionnan no ta cuadra. “Mi no tin masha comentario pa duna como reaccion riba loke Ramoncito Booi a declara” Abraham ta cuminsa na bisa. “Loke mi sa ta cu e no a gana ningun caso di corupcion contra su persona”. Y Abraham ta splica tambe su motivacion. “Simplemente pasobra (te ainda) e acusacionnan a base di sospecho i indicacionnan fuerte cu Ministerio Publico tin contra e persona di Ramoncito Booi no a keda trata den Corte. Esei como cu e Huez Comisario den su caso aki na Bonaire  ta miembro di un "Borrel-club" VNAA hunto cu prominentenan di CDA manera Hans Hillen  ("VriendenGenootschap Ned Antillen en Aruba").” Abraham a sigui bisa.

Segun Abraham, Ministerio Publico ta insisti cu Booi a comete crimennan manera falsificacion, fraude, labamento di placa, tumamento di steekpenning (cen bou di mesa) y un cantidad di cos mas, pues corupcion na gran escala.

“Mi persona, Jopie Abraham, no ta fiscal ni Procurador General. Mi a drenta y sali for di politica cu honor, respet y sin ningun mancha. I entre otro asta a ser condecora pa su Altesa Real como Ridder in de Orde van Oranje Nassau” Abraham ta continua bisando.” Sinembargo, Ramoncito Booi ta un lider politico cu a abusa di e confiansa cu pueblo di Bonaire a dune, probecha di su funcionnan publico y segun Ministerio Publico a comete corupcion na gran escala”. Segun Abraham, kisas como cu e tin amigonan cu a y ta trata na proteha su persona contra persecucion penal i su fechorianan te awe su number no a hunga, pero tardi of trempan esei lo sosode”

“Pues, "pober" Monchi no mester hinca Jopie Abraham den e asunto aki. Miho e bai wak su Kara den spiel y bai puntra Procurador General y Ministerio Publico I Corte pa pura su casonan penal pendiente p'e keda cla pa caba. Laga Corte dicidi en berdad cu e no ta culpabel, loke te awe no a sosode.