Desaroyadornan Isla di Oro posiblemente interesa den otro sitio

ORANJESTAD – E hecho cu e proyecto hotelero na Isla di Oro no ta sigui mas (gobierno a nenga permiso oficialmente siman pasa), no ta kita cu e ta keda un proyecto interesante pa pais Aruba. “Ademas e no ta kita cu e proyecto aki, manera cu e desaroyadornan a tuma contacto, lo ta interesa pa mira un otro posibilidad pa loke ta trata localidad pa por desaroya un tipo di proyecto asina”. Asina minister di infrastructura Otmar Oduber a bisa dialuna mainta durante un conferencia di prensa. E desaroyadornan mes, no a reacciona ainda riba peticion di e portal aki. 

NENGA PERMISO

Tabata diahuebs siman pasa cu gobierno a dicidi pa no aproba peticion pa construi e proyecto hotelero na Isla di Oro. Asina Oduber a informa diahuebs atardi laat. Segun e mandatario, despues di un trayectoria largo cu e proyecto aki a pasa aden, y tumando e consehonan referente e importancia ecologico di e area aki den consideracion, a dicidi di no aproba e peticion pa por construi e hotel na e area aki. Esaki teniendo e bienestar di nos hendenan y nos medio ambiente na cuenta. Por indica cu pa loke ta trata e desaroyo economico di Pais Aruba y tambe e importancia pa atrae e bishitante mas afluente cu berdaderamente lo por contribui na e economia di Aruba, esaki lo keda un punto di importancia.

DESAROYO BALANSA

Sinembargo tur tipo di desaroyo manera menciona lo mester tuma luga den forma balansa y teniendo nos medio ambiente na cuenta. Minister Oduber ta indica cu e tempo a yega pa trata e tema di medio ambiente y bienestar general cu seriedad y pone accion na palabra. Conserva nos medio ambiente y sirbi interes general aun ta un tema cu conoce su retonan pero cu bon comunicacion y e intencion pa colabora tur reto ta wordo transforma den oportunidad.