Canal 90 den aire ainda debi na ‘maneho di tolerancia’ di gobierno

Canal 90 den aire ainda debi na ‘maneho di tolerancia’ di gobierno

Posted on 06/18/2018 6:14 pm AST | Updated on 06/18/2018 6:23 pm AST

ORANJESTAD – E emisora Canal 90 FM ( Voz di Aruba NV) ta transmitiendo ainda, -sin un licencia valido-, debi na un maneho di tolerancia di gobierno. Asina NoticiaCla a compronde via minister di telecomunicacion Chris Romero dialuna. Tabata durante e sancion impone riba e emisora recientemente pa Directie Tele Comunicatie Zaken, cu a bira conoci publicamente cu e emisora lo ta transmitiendo sin un permiso valido. Mas investigacion di NoticiaCla a mustra cu e emisora falta algun ‘rekisito menor’ pa cumpli cune pa nan haya e licencia. “Gedoogbeleid (maneho di tolerancia) ta pone cu ta duna radionan tempo pa cumpli cu tur rekisitonan” Romero a bisa. “A duna nan tempo. Si nan no cumpli, ta trek in. Ta maneho di gobierno di hopi aña” e mandatario a sigui bisa, den cual tambe Canal 90 ta forma parti. E intencion tabata pa cambi’e pero no por hacie cu forza retroactivo.

PUEBLO NA PALABRA

Manera ta conoci, e emisora Canal 90 a haya un sancion siman pasa cu ta prohibie transmiti e programa ‘Pueblo na Palabra’ pa dos dia largo. Motibo tabata pasobra e locutor na turno a permiti un radioyente manda un mensahe di menasa directo di morto contra prome minister di Aruba. Pa ley, esaki no ta permisible, y como tal e mandatario en cuestion a actua y pa medio di e minister di telecomunicacion, DTZ a manda un carta cu e sancion menciona.

REACCION

Tabata den fin di siman cu e director di e emisora, Maria Leoncita Arends a confirma pa NoticiaCla cu nan a ricibi e carta cu cu enberdad e locutor no a actua corecto y cu a tuma medida contra dje. Pero mes momento a mustra cu den pasado otro emisoranan a pasa cosnan cu ‘no por’ y cu no a tuma accion contra e emisoranan aki. Mientrastanto dialuna den e noticiero di e emisora, Arends a splica cu e ta lamenta e accion aki sigur, y cu e ta puntra su mes kico otro emisoranan ta pensa di e acto aki. “Awe ta ami, mayan por ta nan” Arends a bisa. Como invitado den e noticiero, tabatin ex prome minister Mike Eman, cu a yama e acto di gobierno anterior como un acto netamente di persecusion politico. Algo cu segun Eman, e gobierno aki a bin ta practica for di momento cu nan a sinta na November ultimo y cu nos pueblo ‘mester ta preocupa cu e desaroyo aki’.

  • Zulo
  • Powered by SETAR