Segbedzi: Instancianan social a faya cu e dos criaturanan a resulta morto

ORANJESTAD – Instancianan gubernamental y social a faya, cu cos a yega asina leu cu e criaturanan Rishandroh y Eugene cu a fayece na man di nan padrastro aña pasa. Asina abogado di e padrastro, sra Dellali Segbedzi a declara diabierna den corte durante e caso Speeltuin. E abogado no a sconde cu su cliente ta ‘completamente responsabel pa e loke a sosode cu e dos criaturanan, y tambe ta conciente di e dolor cu e la haci e famia y cu obviamente e ta arepenti. Pero e realidad ta segun e abogado, cu e canalnan social a faya, cu no a ‘reconoce’ e ‘red flagsnan (e señal di alerta), y asina evita e tragedia di aña pasa.

SITUACION

E abogado durante su prome palabra ora di hiba defensa, no a sconde e realidad y cu su cliente ta admiti e responsabilidad, pero cu e no por a yuda mirando e estado den cual e cosnan aki a sosode. A describi e bida di un hoben bruha, victima di circunstancia cu e tabata aden for di momento cu e la nace, y cu e no sa actua miho. “E ta un caso hopi tristo unda cu por papia di un caso di mucha, cu mester cria mucha”, refiriendo na e pareha hoben, teenager cu tabatin dificultad pa ‘take care’ di nan mes, y diripiente a haya nan mes ta cuida pa por lo menos 3 mucha mas, nan mesun yiunan.

INSTANCIANAN SOCIAL A FAYA

Segun e abogado, e ta culpa e instancianan gubernamental social, cu no a actua. ‘Pakico e instancianan profesional no a yuda, pakico nan no a intermedia’? e abogado a puntra. Ademas a cuestiona seriamente con por ta posibel cu si muchanan chikito cu no a bay scol for di 17 di augustus aña pasa, no a haya yama di e oficina di leerplicht. Supuestamente tin un leerplicht cu tin cu percura pa tur mucha ta na scol obligatoriamente durante ora di scol. Pero e muchanan aki pa lunas no a bay scol, y ningun alma no a ranca ningun bel. A cuestiona voogdijraad cu no a actua, y si nan a actua mes, a laga di desea. Tabatin suficiente ‘red flags’ cu mester a wordo reconoce pa por a para e situacion cu nunca no por a yega asina leu, segun e abogado. Manera e abogado a usa e dicho Hulandes ‘Iedereen stond erbij en keek ernaar’. “Den un cas cu tabatin tanto violencia, ningun hende a tuma accion?”, Segbedzi a sigui bisa.

LOKE A PASA

E abogado den su defensa a sigui mustra cu no por culpa su cliente di e morto di e dos criaturanan, pasobra no ta e sla cu e la duna nan, a causa nan morto. “E sla cu e la duna, no tabata opzettelijk. E sla no ta loke a causa e morto. Ta e sla di e pochi di WC a causa e morto finalmente” e abogado a sigui bisa. E tata berdad a dal e mucha (Eugene) un canti man, cu a resulta cu e mucha su cabez a dal riba e pochi WC. Pero no tabata intencion pa e mata e mucha, segun e abogado. De hecho, ora cu e mucha a dal su cabez riba e pochi WC, el a bay flauw, y despues di muhe cu awa, e mucha a bin bey, y a pone drumi riba cama. Ta despues e mucha a lanta morto. Pues no por culpa e tata di morto. Mescos tabata cu e caso di e otro yiu. Aki tambe a dal e yiu ey, Rishandroh un canti man, y el a cay riba sofa. E tambe a bay flauw y a haci mescos cune. Pero e no a reacciona y e tata a spanta y a hiba e yiu IMSAN. Pa loke ta e ribchi nan kibra di Eugene, e abogado a splica cu esaki a sosode despues cu Eugene tabata morto caba. Ta ora cu e tata a der’e, a pone bloki riba dje pa evita cu bestianan por a bin coba y saca e curpa for di e buraco. Ta ora cu a dera e mucha y tape cu bloki, cu esaki a kibra e ribchi.

CASTIGO

E abogado a mustra riba e castigo cu a pidi pa su cliente y a pidi mas bien pa tene cuenta cu su situacion. Si dado caso dune un castigo di prison, pa mande Hulanda ya e ora e ta mas cerca di su mayornan cu ta bibando na Hulanda. Y pa loke ta e parti di TBS, ta prefera pa no sinta castigo di prison pero bay di biaha pa tratamento di TBS, of si mester bay prison, pa e esaki sosode simultaneamente cu e tratamento di TBS.