Huez a habri caso Speeltuin atrobe pa parti di e mama di criaturanan

ORANJESTAD – Huez a habri e caso Speeltuin bek diabierna merdia, pa e parti cu ta trata e mama di e criaturanan Rishandroh y Eugene , esta Risheila F.. E motibo ta cu tabatin mucho inconsistencia den e rapport di e psikiatra y e psicologo. Y tanten tin esey, huez a haya prudente pa habri e caso bek pa trata esaki miho. A sugeri pa apunta un di tres experto, sea ta di Corsou of otro caminda cu no ta Aruba, y laga e duna su analisis di e situacion. Pa e motibo ey, a pone un fecha nobo pa continua cu e tratamento, cu ta dia 24 di augustus proximo pa 2’or di merdia.

CARGONAN CONTRA E MAMA

E mama, Risheila F, ta wordo persigui pa medeplegen (comete hunto) of medeplichtigheid (complicidad) di e homicidio di Rishadroh y Eugene y e medeplegen of medeplichtigheid di maltrato severo di e muchanan den e periodo prome cu nan morto, mientras cu e ta mama di e dos muchanan.

Ademas Risheila F. ta wordo acusa di a duna su yiunan insuficiente proteccion.

DECLARA LIBER

Den e caso contra Risheila F. Ministerio Publico a exigi pa e wordo declara liber di e homicidionan y di e maltratonan severo.

Ministerio Publico ta haya cu e mester wordo condena pa complicidad na comete e crimennan aki y pasobra el a keda sin ofrece seguridad na e muchanan. Ministerio Publico a exigi un castigo di prison di 4 aña, di cual 1 aña ta condicional.

Na e parti condicional ta mara tres condicion particular.

Esta, cu e ta keda bao supervision di Reclassering, cu e ta haya tratamiento y cu e ta prohibi pa tin contacto directamente of indirectamente cu Gabriel M. durante e tempo di prueba di 3 aña di tempo.

CARGO MAS ABOU

E castigo di prison cu Ministerio Publico a exigi contra Risheila F. ta bastante mas abao cu esun exigi contra Gabriel M.

E motibo ta cu e mes no a maltrata of a mata e muchanan.

E ta wordo acusa si di a duna Gabriel M. oportunidad pa maltrata e muchanan severamente y mata nan.

Ministerio Publico ta di opinion cu Risheila F. mester a tene e muchanan leu for di Gabriel M. una vez el a haya sa cu e tabata maltrata nan.

Esey sigur cu Rishandroh despues cu Eugene a muri.

A inclui den e exigencia tambe cu Risheila F. mes pa hopi tempo tabata victima di Gabriel M., y cu Risheila ta ademas un ‘first offender’.