Corte evaluando cambio pa brinda mas audiencia den casonan popular

ORANJESTAD – Corte ta evaluando cambia e proceso di presencia caso den futuro, ora cu ta trata di un caso cu tin hopi interes di publico. Entre e posibilidadnan, ta cu kier usa sistema audiovisual pa transmiti e caso pa duna mas hende chens pa wak esaki. Esey corte a informa diabierna atardi despues di e conmocion mas trempan mainta ora cu e caso Speeltuin mester a cuminsa.

E COMOCION

Manera cu NoticiaCla a raporta anteriormente, diabierna mainta un gran cantidad di persona a raporta na e edificio pa por presencia e caso Speeltuin en persona. Fuera di e famia di victima y sospechosonan, a bin un grupo grandi di persona interesa, manera di Universidad di Aruba y Voogdijraad. Na comienso di e caso, a resulta cu no tabatin lugar pa tur hende, y cu a conduci cu mester a duna prioridad na e famianan, a costo di otronan. Asina mes no tabatin suficiente lugar pa tur e familiarnan cu a causa un conmocion pa e famianan, incluyendo wela di e criaturanan. E maneho di corte a compronde e conmocion y a lamenta esaki tambe, segun nan comunicado emiti. “Banda di e publicidad, corte tin tambe e tarea pa garantisa seguriadd pa tur hende den e edificio. Esey por nifica cu mester tuma desicionan fastioso”, e comunicado ta sigui bisa.

SOLUCION

Como solucion, corte lo evalua e futuro bishitanan den un sentido general, special pa casonan futuro, y si ta necesario, percura pa un coneccion audiovisual den un otro sala, si esey ta posibel relaciona cu otro casonan cu ta andando e momento ey.

CORSOU

Mester bisa cu na Corsou, e posibilidad ey ta existi caba, te hasta unda cu periodistanan ta permiti pa relata e suseso den corte, estilo ‘real time’, esta transcribi via medionan social manera twitter y facebook, kico ta sosodiendo den corte, paso pa paso. Esey ta duna e espacio mesora pa mas hende por sigui e caso sin cu nan mester ta fisicamente den corte. Aki na Aruba esey no ta posibel ainda, aunke cu Corte ta hopi flexible cu prensa pa loke ta nan posibilidad di bin cu nan hermentnan di trabou. Nan ta haya cierto privilegio actualmente cu un bishitante regular den corte no ta haya.