Hopi tension den sala di corte durante tratamento caso Speeltuin awe

ORANJESTAD – Si ta pa fiscal Gerritsen, e padrastro di e criaturanan Rishandro y Eugene lo bay cera pa 15 den prison y despues haya tratamento special TBS, y e mama di e criaturanan lo bay cera den prison pa 4 aña, di cual uno ta condicional. Esaki ta trata e caso Speeltuin cu mester a husga tanto e padrastro Gabriel M. como Risheila F. pa e morto di nan dos yiunan Rishandro y Eugene. Mientras cu pa e caso di e padrastro, huez a fiha e fecha di 6 di juli pa dicta sentencia, mientras cu pa e mama, a habri e caso bek pa tende e psikiatra y e psicologo y bolbe corte dia 24 di augustus proximo.

BOMBOSHI DEN CORTE

E caso a cuminsa 45 minuut laat, debi cu tabatin un ‘bomboshi’ na entrada di corte ora cu tabatin mas hende cu kier a presencia e caso, siendo cu no tabatin lugar pa nan tur. A cuminsa un gritamento den porta di e edificio, cu a pone cu mester a atende esaki prome. A tarda por lo menos 45 minuut prome cu e caso por a cuminsa realmente. E situacion cu a surgi, a pone e personal di corte pensa pa bin cu un solucion pa proximo biaha (lesa otro articulo riba e tema aki).

PRESENCIA DI E SOSPECHOSONAN

Esaki tabata e prome biaha cu e dos sospechosonan tabata den corte hunto, ya cu e biaha cu a trata e caso ‘pro forma’, e mama so a presenta pero e padrastro a nenga di presenta den corte. Diabierna si e tabatey, y a te hasta hiba palabra na final. Notable tabata e prome intercambio entre e huez y Gabriel M., unda cu el a practicamente admiti tur loke e ta wordo acusa di dje, y aki aya a purba coregi huez riba algun detayes. E mama di e criaturanan, Risheila F. tabata mas keto, sin emocion, te ora cu e caso a cuminsa. Aki el a bira emocional pero despues a logra contene su mes.

SEGURIDAD EXTRA

Mirando e situacion na inicio, unda cu tabatin dos famia cu lo a topa otro, seguridad tabata riba un alerta halto. For di comienso mester a sinta tur hende den un forma tactico, pa evita cu lo por tabatin confrontacion entre nan. Na comienso a mira e tata biologico di e criaturanan, esta Orlando Anastacia, keto keto, cu lagrima bashando di su wowonan, prome cu e caso a cuminsa. Un persona hopi keto, y cu hopi tristesa riba su cara. Pero unabez cu e padrastro a drenta e sala, Anastacia su postura a cambia mesora y casi no por a contene su mes. Dado momento Anastacia a cuminsa cera wowo, morde su lenga, y su curpa tabata tembla di rabia y tabata dificil pa e contene su mes. Esey a pone cu e personal di seguridad a pidi refuerzo y no menos cu 9 agente di CEA a rondona e sala pa proteccion di tur hende. Pa evita cu e tata biologico por a lanta y ataca e padrastro, a staciona tres agente di seguridad strategicamente rond di dje pa evita cos sali for di man. Tambe e famia di dje, a cuminsa traha cune, calme pa cos por a sigui. Pero segun e acusacionnan tabata wordo trata, y cu e padrastro tabata splica den bos trankil con e la maltrata e criaturanan, e tata biologico tabata fulmina di rabia. Pero ya despues, e la calma y a sigui e caso sin ningun problema.