Gobernador Refunjol bek na trabou atrobe

ORANJESTAD – Gobernador di Aruba Freddis Refunjol, despues di un periodo di vacacion, ta bek na trabou dialuna. Y riba su prome dia, e la ricibi salutashon di Zr. Ms. Holland na ocasion di entrada ceremonial di e barco di patruya hulandes na Aruba.

E salutashon tabata consisti di dos parti; e prome consistiendo di 21 tiro dirigi na e bandera di Reino, cu a wordo respondi cu 21 tiro desde e bahía di gobernador, banda di e restaurant West Deck. E segundo parti tabata dirigi na gobernador y tabata consisti tambe di 21 tiro, y a wordo respondi cu saludo militar. Zr. Ms. Holland awor ta mara na waf di Oranjestad y lo keda eynan te cu diahuebs mainta. Zr. Ms. Holland (P840) ta parti di un serie di 4 bapor di patruya hualndes di marina real ulandes. E bapor a wordo batisa na februari di 2010 pa e tempo ey Reina Beatrix. Na maart 2011 e la haci su prome patruya di prueba y desde mei di anja pasa, e ta patruya den laman Caribe. i

Normalmente e vacacion di gobernador y e regreso na trabou no ta noticia. Pero e vacacion di gobernador a haya hopi atencion e biaha aki, debi cu ta net durante e periodo cu tabatin precupacion riba e situacion di presupuesto y cu hopi no a spera cu gobernador lo a tuma e desicion aki. Tambe e hecho cu e no tabata presente durante apertura parlamentario, a crea tambe mas interes pa sa kico tabata pasando. Atrobe, nada problematico, pasobra pesey tin un reemplasante cu ta hacie funcion sin problema. Investigacion e tempo ey haci a mustra cu e vacacion no tabata nada diferente, sino cu solamente debi na e situacion di july relaciona cu e presupuesto, e mester a pospone esaki te cu september.