• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

• Front Page
• Politica
• Local
  • Social
  • Polis
  • Corte
  • Economia
• Internacional
  • Corsow
  • Region
  • Hulanda
• Deporte
• English
• Opinion
• Live

‹›

• 
• 

Polis cu a dal Zinnia Croes mata, ta sorry pero ‘no por a evita accidente’

ORANJESTAD –Fiscal Schwengle diahuebs mainta a pidi 240 ora di trabou comunitario pa e acusado Jadira V, e polis cu a dal y mata e hobencita Zinia Croes tres aña pasa y kita su rijbewijs pa 2 aña incondicionalmente. Abogado di V. mientrastanto, Chris Lejuez, a pidi vrijspraak pa su cliente, indicando cu tur e puntonan treci dilanti, no tin base legal. Mientrastanto e polis, cu siman pasa a haya castigo disciplinario di KPA mes pa e caso, a bisa huez cu e ta ‘hopi sorry’ di loke a pasa pero cu esaki tabata un accidente cu ‘mi no por a evita’.

E CASO

E caso mes a bin dilanti danki na persistencia di e mayornan di Zinnia, cu aña pasa a apela un sentencia di huez cu a pone cu corte a ordena ministerio publico persigui e polis responsabel pa e accidente. Y for di comienzo di e caso, tabata bisto cu e lo no ta un caso facil, pa e simpel motibo di e delicadeza di e topico, y cu tur partido a admiti cu hopi fayo a tuma lugar cu ta haci e caso mucho mas dificil pa trata. E mayornan y famia di e hobencita y tambe di e polis tabata den sala y tabata bisto cu emocionnan tabata halto. Cada bez cu haci mencion grafico di e suceso, e famia di e hobencita tabata bin ariba. Fiscal a mustra riba e impacto cu e caso tabatin riba comunidad y e famia. Loke mas ta molestia e fiscal, ta cu acusado ta un polis y cu e mester sa miho y no a actua corectamente.

FACTORNAN DETERMINANTE

Loke a establece na cuminsamento, tabata cu e polis a bebe bastante y cu esaki a causa cu e la influencia su actuacionnan despues riba caminda. E polis V tabata na POVA e atardi ey pa dos ora unda cu a establece cu el a bebe 4 whisky coke, y despues hiba su amiga cas. Mas anochi e polis a sali for di su cas, algo despues di 7’or di anochi cu su pareha y 6 mucha, rumbo pa Funari pa un show di baile. E show mester a cuminsa 7:30 y V. tabata laat pa cual e la haya yamada di Funari, pa wak si ‘nan ta make it’ na tempo. Na caminda pa e evento, ta ora cu V. a haya su mes den e accidente, cu a resulta den morto despues di e hobencita Zinnia. Loke a sigui, tabata un serie di evento no coordina, y cu hopi fayo cu a pone cu awe ta dificil pa determina exactamente con e accidente a tuma lugar, y con pa culpa un persona debi na tur e fayonan cometi.

TESTIGONAN

Loke a hala atencion ta e cantidad di testigonan cu a declara den e caso, y unda cu varios di nan a duna declaracionnan contradictorio creando asina duda den e declaracionnan y confusion pa loke realmente a sosode. Entre nan, for di e cantidad di bebida cu e polis a bebe, e tipo di bebida, e ora cu el a sali for di su cas, e cantidad di yamada cu e la ricibi for di momento cu e la sali for di su cas, si e la ricibi yamada mes den auto of no, si tabata scur riba caminda of no, si e auto su glasnan tabata demasiado getint, cuanto mucha tabata riba caya of no, unda e dalmento realmente a tuma lugar. E propio pareha di e polis a duna declaracion contradictorio, e muchanan cu tabata cu Zinnia, tambe a duna declaracionnan diferente, y otro testigonan.

E POLIS

E polis a duna su version riba tur e preguntanan, splicando cu e la dal 4 wisky coke (pareha ta bisa ta dos), cu e la sali algo despues di 7’or for di su cas y cu e distancia no tabata leu di core y nan ta custumbra pa yega e oranan ey. E pareha sinembargo ta bisa cu e tabata gestressed debi cu e tabata laat, y cu e yamadanan di telefon (segun e pareha tabatin varios yamada den e auto, y e polis ta bisa ta un jamada tabatin prome cu a sali for di cas), y cu e auto tabata yen di mucha, ta haci desorden den e auto. Segun e polis, e ta custumbra di core riba e caminda, cu e tint di bentana no tabata scur y cu esey no a impedie di wak riba caminda. E la bisa cu e la wak e 6 muchanan riba caminda canando, (fiscal y testigo ta bisa cu tabatin 3 mucha) y cu el a ‘slow down’ ora cu e la yega un birada cu mester a haci, pero no a brake pa esey. Diripiente un di e muchanan a core pasa su dilanti cu e consecuencia conoci. Ta ora cu el a dal e mucha, el a brake e auto. Un di e muchanan cu tabata testigo a sigura cu ningun momento e a auto a brake. Testigonan a bisa sinembargo cu Zinnia kier a cruza caminda y a wak bon tur dos banda di caminda pa wak pa auto prome e cruza caminda. Pero lamentablemente e no a calcula e velocidad di e auto cu e consecuencia fatal. Loke tur testigo tabata di acuerdo, ta cu e auto tabata core hopi duro, esta cu velocidad halto. Sinembargo e polis (y investigacion a mustra cu) ta sigura cu el a core segun e velocidad maximo (entre 70 cu 80 km pa ora) riba e caminda cu ta permiti maximo 80 km.

ALCOHOL

Un punto hopi importante treci dilanti ta e cantidad di alcohol cu e polis V a consumi e dia ey. El a declara cu el a bebe 4 whisky coke, y no a come prome of despues. Segun rapport di NFI (Hulanda), ta importante pa sa si e persona a come prome cu e la bebe, durante of net despues. Esey por afecta e nivel di alcohol den su curpa. Den e caso aki e polis a admiti cu e no a come nada e dia ey. E intencion tabata pa e come croquete di calco na POVA, pero no tabatin. Despues di e accidente, a laga e polis supla y esaki tabata 515 UGL, cu ta 335 mas cu ta permiti pa ley (210ugl). Dos ora despues na warda di polis, a bolbe lague supla y aki e la supla 310 UGL. E polis a pidi un contra investigacion, pero pa motibo di falta di material, polis no por a haci e contra investigacion pa midi su nivel di alcohol. Pa motibo di esey, no por admiti e prueba di suplemento como prueba, y sin e prueba, no por determina legalmente cu e polis tabata ‘bou di influencia’. Pero asina mes fiscal a mustra cu ta prueba cu e polis tabata bou di influencia.

INVESTIGACION BRUHA

Loke a complica tur cos, ta e fayonan cometi durante e proceso di investigacion for di momento di e accidente. Entre e fayonan, e forma con a haci e investigacion a pone cu no por a ‘establece e punto di impacto’, incluyendo e falta pa inclui e midimento di e marca di brake riba caminda. A resulta cu esnan na e sitio no a haci nan trabou corecto, for di e forma di haci e trabou, te na esnan cu tabata responsabel cu no a haci nan trabou, y a haci trabou di otro. Como ehempel, un verkeersspecialist ta detene e polis e anochi y hibe warda, envez di keda na e sitio y haci su trabou na e sitio, y e generalista nan ta haci nan trabou y haci esaki malo. Huez dado momento mes a conclui cu ‘Tur cos a bay fout!”. Y esnan na e sitio a keha riba e fiscal e momento ey (cu por cierto ta e mesun fiscal cu a trata e caso den corte diahuebs) cu e tabata presiona esnan na e sitio, cu a pone cu a traha procesverbal incompleto. Dado momento, ministerio publico a haye cu dos diferente situacion y declaracion pa cual a manda tur cos pa Nederlands Forensisch Instituut pa haya un ‘second opinion’. For di Hulanda a confirma cu debi na e mal trabou, ‘no por a stel vast hopi cos’.

CASTIGO

Na final, fiscal a pidi castigo di 240 hora di trabou comunitario pa e polis, y pa kita su rijbewijs pa un periodo di dos aña. E polis mientrastanto a confirma cu siman pasa nan a dune un castigo disciplinario, kitando un rango di dje, for di brigadier 1st klasse pa brigadier. E fiscal a basa su mes riba 5 punto, esta coremento burachi, core mucho duro, no a brake na tempo, no tin bon bista riba caminda, y atencion no tabata optimal riba caminda. A bay den detayes riba cada punto. Abogado Lejuez a refuta tur e puntonan un pa un, y na final a pidi vrijspraak pa su cliente. Huez ta dicta sentencia dia 5 di juli proximo pa 8:15 di mainta. NOTA: E potret di portada ta di e mayornan di Zinnia Croes, y su ruman homber grandi.