Ex presidente parlamento evaluando keho contra agresion manifestacion

ORANJESTAD – Ex presidente di parlamento Marlon Werleman ta evaluando pa entrega keho contra varios instancia gubernamental, pasobra e lo a wordo bati pa miembronan di Riot Comando durante e ultimo manifestacion recientemente. Segun Werleman, e tabata presente durante e ultimo manifestacion den cual e tambe a participa, y unda dado momento, segun su version, e la wordo agredi pa quincena (klop), cu a causa varios herida na su curpa. Como tal e ta evaluando pa denuncia KPA, pais Aruba y haci esaki na varios instancia. Den e relato, e ta inclui potretnan cu segun Werleman, ta e resultado di e agresion cu e la sufri.

Werleman, -cu a fungi como presidente di parlamento durante periodo di gobernacion di gobierno di Nelson Oduber-, ta describi e variacion di herida entre un di 15 centimeter, 2 centimeter y algun otro sla mas. Werleman ta compara e nivel di e comportacion di e riot comando, cu esun di augustus di 1977, y ta yame un dia scur den Aruba su historia politico.

Ademas Werleman ta pidi pa un investigacion independiente tuma lugar riba e resultado di e manifestacion, y tambe cu parlamento di Aruba mester a yama un reunion caba, exigiendo un splicacion di e loke a sosode siman pasa diaranson 1 di october. “Si Parlamento di Aruba no exigi e investigacion aki e ora ta keda na pueblo y tur gremio pa exigi esaki di gobierno! Si nada no wordo hasi esaki lo por crea un precedente pa futuro gobiernonan” Werleman ta finalisa bisando.