Diabierna corte ta trata caso ‘Speeltuin’ di asesinato di dos criatura

ORANJESTAD – Diabierna awor Corte ta trata e caso di e mama F. y padrastro M. di e criaturanan Eugene y Rishandro cu a perde nan bida aña pasa cruelmente y a shock comunidad severamente. E caso a bira uno cu a causa rabia y odio den comunidad y cu a haya atencion nacional mesora, y cu gobierno ta usando como un ehempel di kico no mag sosode nunca mas. E caso ta poni pa cuminsa 9’or di mainta diabierna awor.

ACUSACION

M. y F. ta wordo acusa di a intencionalmente tuma bida di un persona dor di dal e un of varios biaha cu forza na su cabez den e periodo di 21 di november 2017 pa 24 di november 2017. M. y F. ta wordo acusa di a causa varios biaha lesion grave na e persona aki (esta, wesonan kibra) dor di dal e cu forza cu man of mokete, palo di basora of slof durante e periodo di prome di augustus 2014 te 20 di november 2017.

M. y F. ta wordo acusa di a intencionalmente tuma bida di un di dos persona dor di dal e cu su cabez un of mas biaha cu forza na su cabez, a consecuencia di cual e persona aki a cay cu su cabez contra un pochi di wc, den e periodo di prome di september 2017 pa 31 di oktober 2017.

M. y F. ta wordo acusa di a intencionalmente causa varios biaha lesion grave na e di dos persona aki (esta, ribchinan kibra) dor di dal e cu forza cu man of mokete, palo di basora of slof durante e periodo di prome di augustus 2014 te prome di september 2017.

F. ta wordo acusa di a laga e dos personanan aki varios biaha y intencionalmente den un estado desampara (mientras F. tabata sa cu nan tabata wordo maltrata gravemente y cu frecuencia pa M. y cu nan no por a defende nan mes) dor di keda sin actua na ora y/of dor di keda sin hiba nan na un lugar safe na ora y/of dor di keda sin proteha nan y/of dor di keda sin duna nan ayudo medico y cuido medico adecua, loke tabatin lesion grave y nan morto como consecuencia.

M. ta wordo acusa di a maltrata F. durante e periodo di prome di augustus 2014 te 24 di november 2017 dor di dal e cu man of mokete, palo di basora of slof.

M. ta wordo acusa di a dera, sconde, transporta y desparce e curpa di e prome persona menciona den e citacion aki, cu e intencion pa sconde e hecho y causa di su morto den e periodo di prome di september 2017 te 31 di oktober 2017.